Дорнод аймгийн Баяндун сумын харьяат, Монгол Улсын анхны онолын физикч, нэрт эрдэмтэн Дугаржавын Цэрэнгийн нэрэмжит Улсын физикийн 37 дугаар олимпиад Дорнод аймагт гурван өдрийн турш амжилттай болж өндөрлөжээ. Энэ жилийн олимпиад түүхэндээ анх удаа "Нэрэмжит" болж зохион байгуулагдаж буйгаараа онцлог юм.
Мөн анх удаа олон улсын олимпиадын стандартаар зохион байгуулсан ба 21 аймаг, 9 дүүргийн шилдгийн шилдгүүд болох 13-74 насны 152 багш, суралцагчид оролцож оюун ухаанаараа өрсөлдсөнөөс 30 сурагч, 15 багш нийт 45 оролцогч шилдгээр шалгарсан юм.
Улсын физикийн олимпиадын
- 9 дүгээр ангийн төрөлд Орхон аймгийн "Орхон Билигт-өргөө" сургуулийн сурагч Б.Болд,
-12 дугаар ангийн төрөлд Улаанбаатар хот 1 дүгээр сургуулийн сурагч М.Мөнх-Оргил,
- "Багш" төрөлд "Олонлог-Эгзэ" сургуулийн физикийн багш Э.Гүндалай нар тус тус тэргүүлж, алтан медаль авлаа.
Энэ удаагийн олимпиадыголон улсын олимпиадын стандартын жишгээр шүүлтийг программчлан явуулсан бөгөөд мөн шагналт байруудын тоо нэмэгдсэн юм.
Мөн Байгалийн шинжлэх ухааны хичээлийн сурагчдын бүтээлийн үзэсгэлэн дэлгэхээс гадна физикийн лабораторийн багаж ашиглан туршилтын уралдааныг зохион байгуулснаараа онцлог байлаа.
Олимпиадад оролцогч хүүхдүүдээ бүлгийн зохион байгуулалтад оруулж, олимпиадаас бусад чөлөөт цагийг зөв боловсон өнгөрүүлэх зорилгоор Чойбалсан хоттой танилцах, спортын тэмцээн зохион байгуулах, сэтгэлзүйн зөвлөгөө, хүүхэд хамгаалал чиглэлээр мэдээлэл сургалт өгөх зэрэг тусгай хөтөлбөрийг гарган ажилласан юм.
Дорнод аймгийн Засаг дарга Ш.Ёл орон нутгийн төсвийн 48 сая төгрөгийн хөрөнгө оруулалтаар аймгийнхаа 23 сургуульд хичээлд ашиглагдах тоног төхөөрөмж багц хэрэглэгдэхүүнийг хүлээлгэн өгчээ.
Улсын физикийн олимпиад ирэх жил Баян-Өлгий аймагт болно.
Сэтгэгдэл (0)
Сэтгэгдэл бичигдээгүй байна