Монгол Улсын Ерөнхий сайдын ивээл дор Монголын математикийн олимпиадын 5 удаагийн аварга Бямбаагийн Баяржаргалын нэрэмжит “УЛСЫН МАТЕМАТИКИЙН 62 ДУГААР ОЛИМПИАД” Баянхонгор аймагт өчигдөр /2026.03.29/ нээлтээ хийлээ.
Хонгор нутагт хоёр дахь удаагаа зохиогдож буй Улсын математикийн 62 дугаар олимпиадад оролцох эрхээ авсан, Монгол Улсын 21 аймаг, 9 дүүргээс шалгарсан 240 шилдэг багш сурагчид, зохион байгуулагчид нээлтийн арга хэмжээнд өргөн бүрэлдэхүүнтэй оролцсон юм.
Олимпиадыг Монголын Олимпиадын хорооны Ерөнхийлөгч Б.Чандмань нээж үг хэлэн, Баянхонгор аймгийн Засаг дарга Э.Энхбат мэндчилгээ дэвшүүлэв.
Оюуны спортын улсын олимпиадыг орон нутагтаа хийхээр 2 жилийн өмнөөс санал санаачилга өрнүүлэн, улмаар эрхээ албан ёсоор авснаар "Хонгорын математик" төсөлт арга хэмжээг эхлүүлж, бэлтгэл ажлаа багагүй хугацаанд хангаж, нэрлэсэн жилийн хүрээндээ улсын олимпиадыг 30 жилийн дараа орон нутагтаа зохион байгуулж буйгаа Засаг дарга Э.Энхбат мэндчилгээндээ онцлон дурдлаа.
2003, 2008, 2012 оны математикийн багшийн төсөлд мөнгөн медаль, 1998, 2014 онд Багшийн ангилалд Уран бодолтын шагнал, 1996, 1998, 2004, 2005, 2013 оны алтан медальт Бямбаагийн Баяржаргал багш өөрийн нэрэмжит Улсын олимпиадынхаа нээлтэд оролцох үеэрээ нийт оролцогчдод хандан амжилт хүсэв.
Улсын математикийн 62 дугаар олимпиадын тугийг ММОХ-ны гишүүн Б.Эрдэнэбаяр, Т.Цэрэнлхам нар залж, Тангаргийг Нийслэлийн 14-р сургуулийн сурагч Н.Залуудай, Төгс алгоритм сургуулийн сурагч Т.Жавхланзаяа, Шинэ Монгол сургуулийн багш Д.Алтангэрэл, Массачусетсийн технологийн их сургуулийн оюутан Д.Энэрэлт, Боловсролын газрын мэргэжилтэн Л.Мөнхжаргал нар нийт оролцогчдоо төлөөлөн өргөсөн юм.
Нээлтийн үйл ажиллагаанд Монголын Математикийн Олимпиадын Хорооны Дарга Ү.Отгонбаяр, Засаг даргын зөвлөх, Улсын математикийн 62 дугаар олимпиадыг зохион байгуулах ажлын хэсгийн ахлагч Д.Ууганцэцэг, Аймгийн Засаг даргын Тамгын газрын дарга П.Отгонбаяр, хэлтсийн дарга В.Наранчимэг, Боловсролын газрын дарга Л.Аюурзана болон Монголын математикийн олимпиадын хороо, Улсын математикийн 62 дугаар олимпиадыг зохион байгуулах ажлын хэсгийн гишүүд, үе үеийн математикийн ахмад, залуу багш нар оролцжээ.
Улсын математикийн олимпиадын 62 жилийн түүхэнд оюун ухаан, мэдлэг чадвараараа манлайлан, өндөр амжилт гаргаж, эрхэм хүндтэй медалийн эзэд болсон Самдангийн Бумцэнд агсны гэр бүл, үр хүүхэд, Гомбодоржийн Баярмагнай, Сүхбаатарын Цагаан, Батын Анхбаяр, Мөнхжаргалын Буянбилэг нарын Баянхонгор аймгийн үе үеийн шилдэг оролцогчдодоо аймгийн зүгээс хүндэтгэл үзүүлж, бахархал, талархлаа өргөн барьсан байна.
Улсын математикийн 62-р олимпиадад мэдлэг оюунаа сорих 21 аймаг, нийслэлийн 9 дүүргээс шалгарсан оролцогчид маань сэтгэлгээ хурд, оюун мэдлэгээрээ бодож, сэтгэж өрсөлдөхийн зэрэгцээ бие биенээсээ суралцсан нөхөрсөг дурсамжийг Хонгор нутагт бүтээх буй за. Үүгээр зогсохгүй багш шавь нарын халуун дулаан уулзалт, багш нарын сурган хүмүүжүүлэх арга барил, шинэлэг санал санаачилга урган гарах санаа оноогоо хуваалцах эрхэм мөчүүд энэ хугацаанд тохиох нь дамжиггүй юм гэж шилдэг сурагчдыг халуун сэтгэлээр хүндэтгэн хүлээн авсан Хонгор нутгийнхан онцолсон юм.
2026 оны гуравдугаар сарын 28-аас дөрөвдүгээр сарын 2-ны өдрүүдэд Баянхонгор аймагт зохиогдож буй Улсын олимпиадын зохион байгуулагчаар Боловсролын яам, Боловсролын Ерөнхий газар, Монголын математикийн олимпиадын хороо, Баянхонгор аймгийн ЗДТГ, Баянхонгор аймгийн Боловсролын газар ажиллаж байна. Олимпиадын ивээн тэтгэгчээр "Эрдэнэмонгол" ХХК болон олон ажил ахуйн нэгжүүд, Доржпалам сан, Батсуурь сан, Оюун Боловсролын Цог сангууд оролцсон байна.
Сэтгэгдэл (0)
Сэтгэгдэл бичигдээгүй байна