ЦАХИЛГААН ТАМХИ ХУВААЖ ТАТСАН 18-ТАЙ АНГЛИ ОХИН МЕНИНГИТЭЭР ӨВДӨЖ, АМЬ АЛДАХ ШАХЖЭЭ

Өсвөр насны охин найзуудтайгаа шөнө зугаалж явахдаа цахилгаан тамхи хувааж татсаны дараа менингитээр өвдсөн тохиолдол Англид гарчээ.

“Хүмүүс үүнийг ойлгож, анхаарах хэрэгтэй” гэж түүний ээж Керри Дюррант охин нь менингитийн улмаас бараг нас барах шахсаны дараа хэлж, бусдад сэрэмжлүүлсэн байна.

2024 оны аравдугаар сард Английн Норвич хотын оршин суугч, 18 настай Сиан Алдертон найзуудтайгаа клубт зугаацсанаас хоёр хоногийн дараа ер бусын, хүнд шинж тэмдгүүд мэдэрч эхэлсэн гэж Southwest News Service мэдээлсэн байна. 

Ээж Керри Дюррант нь охиных нь бие муу байгааг илтгэх хэд хэдэн шинж тэмдэг байсан гэж хэлжээ.

“Оройн 8 цагийн үед тэр “Ээж ээ, миний бие муу байна" гэж хэлсэн. Тэгээд надтай хамт унтахыг хүссэн. Өвдсөн үедээ өмнө нь тэр хэзээ ч ингэж байгаагүй. Шөнөжингөө би түүнийг сэрж байгааг мэдэрч, сонсож байсан.” гэсэн байна. 

37 настай Дюррант охиноо өдрийн турш ажиглаад бараг хөдөлж чадахгүй байгааг нь анзаарчээ. “Тэр маш их ус ууж байсан. Босож явж чадахгүй, бүх бие нь өвдөж байсан. Угаалгын өрөө рүү мөлхөж ороход нь би ямар нэгэн асуудал үүсэж гэдгийг ойлгосон.” гэж ээж нь ярьсан байна. 

Тэрбээр охиноо яаралтай эмнэлэгт хүргэсэн бөгөөд эмч нар үзлэг хийсний дараа өсвөр насны охиныг шууд эмнэлгийн аргаар комд оруулсан. Охин менингит туссаны улмаас 24 цаг тэсэхгүй байж магадгүй гэж эмч ээжид нь хэлсэн байна.

Эмч нар охин халдварыг зугаалсан тэр орой үнсэлцэх эсвэл цахилгаан тамхи хувааж татсанаас авсан байх магадлалтай гэж үзжээ. “Тэр шөнө би олон хүнтэй цахилгаан тамхи хувааж хэрэглэсэн, тиймээс тэндээс халдвар авсан байх гэж бодож байна." хэмээн охин хүлээн зөвшөөрсөн байна. 

Аз болоход өдгөө 19 настай Алдертон бүрэн эдгэрчээ. Шинжилгээний хариу нь түүний тархинд удаан хугацааны ямар нэгэн гэмтэл үлдээгүйг илтгэсэн байна.

Гэсэн хэдий ч энэ аймшигтай үйл явдлаас хойш тэр гадагш гарч зугаалахаас эмээдэг болжээ.

“Би дахиж шөнийн зугаалгад яваагүй. Хамгийн ихдээ л нэг, хоёр уушийн газар орж суухыг зориглосон. Гэхдээ үүнээс өөрөөр бол гадагш гарахыг хүсэхгүй байгаа.” гэж охин ярьсан аж. 

Уг явдлаас хойш  тэр цахилгаан тамхинаас бүрэн татгалзаагүй ч дахиж хэнтэй ч хувааж татахгүй гэсэн байна.

Алдертон Англид гарч буй менингитийн дэгдэлтийн талаар мөн ярьсан бөгөөд хоёр залуугийн аминд хүрч, дор хаяж 20 хүнийг өвчлүүлээд байгаа энэ асуудлыг нэгэн шөнийн клубтэй холбоотой гэж үзэж байгаагаа илэрхийлжээ. Тэрбээр хүмүүст аль болох хурдан эмнэлгийн тусламж авахыг уриалсан байна.

“Хэрэв танил чинь гэдэс нь хямарсан, дээр нь ухаан самуурсан мэт байдалтай, ердийнхөөс илүү түрэмгий байвал болгоомжлоход илүүдэхгүй. Яаралтай эмнэлэгт ханд. Заримдаа тууралт огт гардаггүй, тиймээс хүмүүс амь насанд аюултай байдалд орсныг анзаарахгүй өнгөрч болно.” гэж тэр сануулжээ.

Охины ээж Дюррант  “Хүмүүс энэ өвчин хэнд ч тусаж болохыг ойлгох хэрэгтэй. Чи ямар ч эрүүл чийрэг байлаа гээд өвчилж болох тул сэрэмжлэх хэрэгтэй.” гэсэн байна.