АНУ-ын ерөнхийлөгч Дональд Трамп 82 дугаар агаарын десантын дивизээс 1000 гаруй цэргийг Ойрх Дорнод руу илгээхийг зөвшөөрсөн тухай хэвлэлүүд мэдээлж байна.
Sky News болон NBC News-ийн мэдээлснээр Трамп энэ шийдвэрийг баталсан бөгөөд штаб, удирдлагын бүрэлдэхүүн болон зарим хуурай замын хүчний илгээлтийн тушаалуудыг боловсруулж байгаа аж.
АНУ-ын армийн 82 дугаар агаарын десантын дивиз нь шүхрийн десантын гэнэтийн довтолгоогоор мэргэшсэн, элит явган цэргийн нэгж бөгөөд нийт 3000 гаруй цэргээс бүрддэг. Харин энэ удаад Ойрх Дорнод руу илгээх цэрэг нь 1500-гаас бага байна гэж хэвлэлүүд мэдээлж байгаа юм. Ийнхүү нэмэлтээр илгээх цэргүүд одоогоор АНУ-аас хөдлөөгүй байгаа бөгөөд ойрын өдрүүдэд явуулж магадгүй аж.
Дональд Трамп Ирантай хийж буй дайныг зогсоох хэлэлцээ хийгдэж байгаа, "Тегеран хэзээ ч цөмийн зэвсэгтэй болохгүй гэдгийг зөвшөөрсөн” гэж Цагаан ордонд сэтгүүлчдэд мэдэгдсэн юм. Мөн “Үүнийг дэглэмийн өөрчлөлт гэж хэлж болно. Бид энэ дайнд ялсан” гэжээ. Түүнчлэн өмнө нь довтлохоор заналхийлж байсан Ираны Өмнөд Парсын байгалийн хийн ордыг дурдан “Хэрвээ би тийм том, хүчирхэг байгууламжийг устгахыг хүсвэл тэд юу ч хийж чадахгүй” гэж мэдэгдсэн байна. Ираныг цэргийн хувьд бүрэн сүйрсэн гэж үзэж байгаагаа илэрхийлж, “тэд дууссан” гэж ч хэлжээ.
Гэсэн хэдий ч Трампын мэдэгдэлд энэ дайн бодитоор хэрхэн дуусах талаар тодорхой тайлбар бараг байгаагүй гэж ажиглагчид үзэж байна.
Мөн түүний засаг захиргааны гишүүд Ираны “зөв хүмүүс”-тэй хэлэлцээ хийж байгаа гэж хэлсэн бөгөөд Тегеран өөрт нь “бэлэг” өгсөн, энэ нь газрын тос, байгалийн хий болон Ормузын хоолойтой холбоотой гэж мэдэгдсэн ч дэлгэрэнгүй тайлбар өгөөгүй байна.
Гэхдээ энэ мэдэгдэл нь Ираны албаныхан АНУ-тай ямар нэгэн холбоо тогтоосон гэдгийг үгүйсгэж, ийм яриа хэлэлцээний тухай мэдээллийг газрын тосны зах зээлд нөлөөлөх зорилготой “хуурамч мэдээ” гэж нэрлэснээс ердөө нэг өдрийн дараа гарч байгаа нь эргэлзээ төрүүлж байгаа юм.
Үүний зэрэгцээ Ираны арми “бүрэн ялалтад хүрэх хүртэл тэмцлээ үргэлжлүүлнэ” гэж мэдэгдэв. Хошууч генерал Али Абдоллах Алиабади АНУ-ыг “хоосон” улс хэмээн шүүмжилж, дэлхийн өмнө “доройтсон” гэж хэлээд, Трампыг өөрийн эхлүүлсэн дайнаас “зугтахыг оролдож байна” гэж дооглон ярьжээ.
АНУ Ойрх Дорнод руу 1000 гаруй цэрэг нэмэлтээр илгээхээр болсон тухай өмнө дурдсан мэдээллийг хэд хэдэн хэвлэл мэдээлсэн нь Трампын энхийн хэлэлцээ явагдаж байна гэсэн мэдэгдлийг үгүйсгэж байна гэж олон нийт үзэж байгаа юм.
Үүний зэрэгцээ Израил өмнөд нутгийн хэсгүүдийг эзлэн авч “аюулгүй бүс” байгуулах төлөвлөгөө зарласны дараа Ливан улсын оршин тогтнол аюулд ороод байна гэж албаныхан анхаарууллаа. Ливаны олон иргэн өмнөд нутгийн томоохон хэсгийг Израил удаан хугацаанд эзлэх вий гэж болгоомжилж байна. Израилийн Батлан хамгаалахын сайд Исраэль Кац энэ сард дайны улмаас дүрвэсэн өмнөд Ливаны хэдэн зуун мянган оршин суугчид Израилийн хойд нутгийн иргэдийн аюулгүй байдал хангагдах хүртэл өмнө зүгт буцаж очихгүй гэж мэдэгдээд байгаа юм. Израилийн тал Ливаны Бейрут хотын хүн ам шигүү суурьшсан өмнөд захын 7 дүүргийн оршин суугчдад аюул ослоос зайлсхийхийн тулд яаралтай нүүн шилжих шаардлагатай талаар анхааруулга өгөөд байна.
Сэтгэгдэл (0)
Сэтгэгдэл бичигдээгүй байна