Монгол Улсын Гавьяат тамирчин, Дэлхийн аваргын мөнгө, хүрэл медальт Төмөр-Очирын Тулга өөрийн төгссөн Сонгинохайрхан дүүргийн 104 дүгээр сургуулийнхаа хүүхдүүдэд чөлөөт бөхийн дэвжээ бэлэглэжээ.
Т.Тулга "Бөхийн буян их ээ.
Чөлөөт бөх хэмээх их спортын буян заяанд хөглөгдөн 17 жил явахдаа олон сайхан багш нар, олон сайхан хүмүүсийн сэтгэл итгэлээр дэмнүүлж ирлээ.
Анх 2009 онд бага ангийн сурагч байхдаа 104 дүгээр сургуулийнхаа нэр дээрээс Сонгинохайрхан дүүргийн аварга шалгаруулах чөлөөт бөхийн тэмцээнд орж анхны хүрэл медалиа авч, их спортын замналаа эхлүүлж байлаа. Тэр үеэс хойш спортын уналт босолт, алдаа оноо, баяр баясал бүх зүйлийг мэдэрч ирлээ.
Энэ жил өөрийн олон жилийн бодол болсон сайн үйлс хийх мөрөөдлөө биелүүлсэн сайхан үйл явдал тохиолоо. Өөрийн хичээл зүтгэлийн үр шим олон сайхан тэмцээнийхээ шагналаар өөрийн төгссөн Сонгинохайрхан дүүргийн Тэргүүний 104-р сургуулийнхаа хүүхдүүд, мөн өсөж өндийсөн Зүүн салааныхаа олон зуун хүүхэд багачуудад чөлөөт бөхийн дэвжээ бэлэглэж, бөхийн спортод дурлуулах, мөн бие бялдараа эрүүл тэгш хөгжүүлэх, цагаа зөв өнгөрөөх боломжийг олгож байгаа үйлс минь эхлэлээ тавилаа.
Энэхүү дэвжээгээ Монгол Улсаас минь олон олимп, дэлхийн аваргууд төрөн гарах болтугай хэмээн бэлгэшээн ОЛИМПИЙН АВАРГУУД хэмээн сайхан нэрлэлээ.
Миний зорилго Сум болон 10 жилийн сургуулиудад үргэлжлүүлэн дэвжээ бэлэглэх зорилготой. Хамгийн эхний дэвжээгээ өөрийн санхүүжилтаар бэлэглэж, цаашдаа сайн хүмүүсийн туслалцаа дэмжлэгтэй дэвжээгээ бэлэглэх зорилготой энэхүү сайн үйлсийн аяныг дэмжиж олон хүүхэд залуусын ирээдүйд үнэтэй хөрөнгө оруулалт хийхийг уриалж байна." гэжээ.
Сэтгэгдэл (0)
Сэтгэгдэл бичигдээгүй байна