АНУ-ын ерөнхийлөгч Дональд Трамп Ираны цахилгаан станц болон эрчим хүчний дэд бүтцэд чиглэсэн бүх агаарын цохилтыг тав хоногийн хугацаанд хойшлуулахыг Батлан хамгаалах яамандаа үүрэг болгосон гэж мэдэгдлээ. Тэрбээр энэ шийдвэр нь үргэлжилж буй уулзалт, хэлэлцээ хэр амжилттай болохоос хамаарна гэж Truth Social дээр бичжээ.
Трампын мэдэгдэж буйгаар сүүлийн хоёр хоногт Вашингтон ба Тегеран “Ойрх Дорнод дахь дайсагналыг бүрэн бөгөөд бүхэлд нь зогсоох” талаар “маш сайн, үр дүнтэй яриа хэлэлцээ” хийсэн гэнэ.
Дональд Трамп өнгөрсөн бямба гарагт Иранд Ормузын хоолойг нээхэд зориулж 48 цагийн хугацаа өгсөн бөгөөд эс тэгвэл цахилгаан станцуудыг нь устгана гэж мэдэгдсэн. Дэлхийн газрын тос, шингэрүүлсэн хийн нийлүүлэлтийн ойролцоогоор тавны нэгийг дамжуулдаг чухал усан зам болох Ормузын хоолойг одоогоор Иран хаасан байдалтай байгаа юм.
Иран хэрэв АНУ Трампын заналхийллийг хэрэгжүүлбэл Ойрх Дорнод даяарх чухал дэд бүтцийг, тэр дундаа усны хангамжийн системүүдийг “эргэлт буцалтгүй устгана” гэж хариу мэдэгдсэн юм. Мөн Иран АНУ-ын цэргийн баазуудыг цахилгаанаар хангадаг бүс нутгуудын цахилгаан станцуудыг, түүнчлэн америкчуудын хувь эзэмшдэг эдийн засаг, аж үйлдвэр, эрчим хүчний дэд бүтцүүдийг онилно гэж анхааруулжээ.
Трампын мэдэгдлээс харахад АНУ болон Иран “бүрэн бөгөөд бүхэлд нь шийдвэрлэх” тохиролцоонд хэрхэн хүрэх нь тодорхойгүй байна.
Дональд Трамп өмнө нь энэхүү мөргөлдөөний зорилго нь дэглэмийг солих явдал гэж хэлж, Ираны ард түмнийг эх орноо буцаан авахыг уриалж байсан. Гэвч энэхүү зөрчилдөөн эхнээсээ тодорхой зорилгогүй байсан бөгөөд явцын дунд зорилгууд нь өөрчлөгдсөөр ирсэн гэж олон хүн дүгнэж байгаа юм.
Мөн энэ нь дэлхий даяар, тэр дундаа АНУ-д эдийн засгийн ихээхэн хохирол учруулж, шатахууны үнэ огцом өсөхөд хүргээд байна.
АНУ болон Израил өндөр албан тушаалтнуудыг, тэр дундаа Ираны дээд удирдагч Али Хаменеиг устгасан хэдий ч Ираны засгийн газар эрх мэдлээ хадгалсан хэвээр байгаа бөгөөд түүнийг хүү Можтаба Хаменеи нь залгамжлан гарч ирж, сонгогдсон юм.
Шинжээчдийн үзэж байгаагаар Иран Ормузын хоолойг хяналтдаа байлгах чадвараа хадгалж байгаа нь Трампын эрх мэдлийн хязгаарыг сорьж, нөхцөл байдлаас гарах тодорхой гарц харагдахгүй байна.
Ираны Исламын хувьсгалт гвардтай (IRGC) холбоотой Fars News Agency агентлаг нэг эх сурвалжаас иш татан Иран болон Дональд Трампын хооронд “шууд болон шууд бус ямар ч холбоо байгаагүй" гэж мэдээлжээ. Энэ нь АНУ-ын ерөнхийлөгчийн хийсэн мэдэгдэлтэй зөрчилдөж байгаа юм.
Нэр нь тодорхойгүй эх сурвалж Трамп Иран Ойрх Дорнодод байрлах цахилгаан станцуудыг онилно гэдгийг сонссоны дараа “буулт хийсэн” гэж мэдээлжээ.
Их Британийн Trade Nation компанийн зах зээлийн ахлах шинжээч Дэвид Моррисон Дональд Трамп “сүүлийн үеийн түүхэн дэх хамгийн онцгой зах зээлийн эргэлтүүдийн нэг”-ийг үүсгэлээ гэж дүгнэв. Дональд Трамп “үр дүнтэй яриа хэлэлцээ болсон” гэх "эргэлзээтэй" мэдээллийг цахим сүлжээнд нийтэлсний дараа хувьцааны ханш тэр дороо эргэж, огцом өссөн гэж Моррисон хэлжээ.
Мөн энэ мэдэгдэлтэй зэрэгцэн газрын тосны үнэ огцом буурсан бол алт, мөнгөний ханш шөнийн турш огцом унасныхаа дараа тус бүр 9 ба 14 хувиар сэргэж, эрчимтэй өссөн байна.
Гэвч Трампын мэдэгдлийг Ираны тал баталгаажуулаагүй, харин ч үгүйсгэснийг анхаарах хэрэгтэй гэж шинжээчид сануулж байна.
Сэтгэгдэл (0)
Сэтгэгдэл бичигдээгүй байна