АНУ ДАЛАЙД БАЙГАА ИРАНЫ НЕФТИЙН ХОРИГИЙГ ЦУЦАЛЖ, ҮНИЙГ ТОГТВОРЖУУЛАХЫГ ЗОРИВ

Дональд Трамп АНУ Ираны эсрэг дайнд зорилгодоо хүрэхэд тун ойртсон бөгөөд цэргийн ажиллагаагаа аажмаар зогсоох талаар бодож байна гэж мэдэгдлээ.

Тэрбээр мөн “Ормузын хоолойг ашигладаг бусад улсууд шаардлагатай бол өөрсдөө хамгаалж, хяналт тавих ёстой- АНУ ашигладаггүй. Хэрэв хүсвэл бид эдгээр улсуудад  тусална, гэхдээ Ираны аюул арилсны дараа ийм тусламж шаардлагагүй болно. Энэ нь тэдний хувьд цэргийн хялбархан ажиллагаа байх болно.” гэж хэлжээ.

АНУ-ын Сангийн яам далайд аль хэдийн ачигдсан Ираны нефтийн тодорхой хэсгийг худалдан авахыг зөвшөөрч, худалдан авагчдыг өөрсдийн хориг арга хэмжээнээс чөлөөлжээ. Тус зөвшөөрөл дөрөвдүгээр сарын 19-н хүртэл хүчинтэй байна. Энэ шийдвэр нь АНУ-Израилийн Ираны эсрэг дайнаас үүдэн газрын тосны үнэ огцом өссөн байдлыг тогтворжуулах зорилготой юм.

АНУ-ын Сангийн сайд Скотт Бессент энэ долоо хоногийн эхээр Fox Business Network-ийн нэвтрүүлэгт оролцохдоо энэ алхмыг урьдчилан мэдэгдэж байсан. Тэрбээр “Ойрын өдрүүдэд бид далайд байгаа Ираны нефтийн хоригийг цуцалж магадгүй. Ойролцоогоор 140 сая баррель байгаа” гэжээ.

Мөн “Энэ нь Ираны гаргасан 10-14 хоногийн нийлүүлэлт бөгөөд бүгд Хятад руу явах байсан” гэж нэмж хэлсэн аж. Түүнчлэн ойрын 10–14 хоногийн хугацаанд нефтийн үнийг тогтвортой байлгахын тулд Ираны нефтийг өөрсдийнх нь эсрэг ашиглах болно гэж тайлбарлажээ.

БЕЙРУТЭД 1000 ГАРУЙ ХҮН АМЬ ҮРЭГДСЭНИЙ ДОР ХАЯЖ 118 НЬ ХҮҮХЭД БАЙНА  

Израилийн Батлан хамгаалах хүчний төлөөлөгч твиттерт Бейрутын өмнөд захын оршин суугчдыг нэн даруй шилжин нүүхийг уриалж, Израилийн арми Хезболлахын дэд бүтэц гэж тодорхойлсон объектуудыг онилно  гээд хэд хэдэн дүүргүүд халдлагад өртөх эрсдэлтэйг онцолжээ.

Израилын гуравдугаар сарын 2-нд эхэлсэн Ливан дахь довтолгооноос хойш Бейрутын хүн ам шигүү суурьшсан өмнөд захын дүүргүүд рүү удаа дараа хүчтэй цохилт өгсний улмаас 1000 гаруй хүн амь үрэгдсэний дотор дор хаяж 118 хүүхэд байгаа юм. Мөн  2500 гаруй хүн шархадсан, 1 сая гаруй хүн орон гэрээ орхин дүрвэхэд хүрсэн байна.

ОНГОЦНЫ ТҮЛШНИЙ ҮНЭ НЭМЭГДСЭНЭЭС UNITED AIRLINES НИСЛЭГҮҮДИЙНХЭЭ 5 ХУВИЙГ ЦУЦАЛНА  

United Airlines компанийн гүйцэтгэх захирал Скотт Кирби Ойрхи Дорнод дахь дайн хурцдаж, онгоцны түлшний үнэ огцом өсөж байгаатай холбоотойгоор энэ онд төлөвлөсөн нислэгүүдийнхээ ойролцоогоор 5 хувийг богино хугацаанд цуцална гэжээ.

“Хэрэв үнэ энэ түвшинд хэвээр байвал зөвхөн онгоцны түлшинд жилд нэмэлт 11 тэрбум ам.долларын зардал гарна” гэж Кирби ажилтнууддаа илгээсэн мэдэгдэлдээ дурдсан тухай Reuters мэдээлсэн байна.

Мөн Кирбигийн хэлснээр тус компани энэ намар нислэгийн бүрэн хуваариа сэргээхээр төлөвлөж байгаа ажээ.