АНУ-ын ерөнхийлөгч Дональд Трамп “АНУ Ираны дараагийн удирдагчийг сонгох үйл явцад оролцох ёстой" гэж мэдэгджээ. Можтаба Хаменеиг эцэг Али Хаменеинхээ оронд сонгогдохыг хүлээн зөвшөөрөх боломжгүй гэж тэр хэлсэн байна.
Мөн Дональд Трамп Ираны агаарын болон тэнгисийн цэргийн хүчин бараг устсан гэсэн мэдээлэл хийснийг хэвлэлүүд нотолгоогүй гэж үзэж байна. Түүний хэлснээр АНУ, Израилын хамтарсан довтолгоо Ираны пуужин, дроны хүчин чадлыг цаг ирэх тусам бууруулж байгаа гэнэ.
АНУ-ын Конгрессын Төлөөлөгчдийн танхимын олонх нь Ирантай хийж буй дайныг зогсоох тухай Ардчилсан намын санал болгосон тогтоолыг хүлээж авахгүй гэжээ. Ингэснээр Трампын засаг захиргаа мөргөлдөөнийг үргэлжлүүлэх боломжтой болсон юм.
Их Британийн Батлан хамгаалахын сайд Жон Хили АНУ-Израилийн Иранд хийж буй цохилтод нэгдэх боломжийг үгүйсгээгүй байна. Харин Украины ерөнхийлөгч Владимир Зеленский АНУ-аас дронуудтай тэмцэхэд туслах хүсэлт авсан гэж мэдэгдээд байгаа юм. Украин энэ төрлийн дроны эсрэг Оросын дайнд олсон туршлагаа ашиглах боломжтой гэжээ.
Израилийн арми Ливаны Бейрут хотын өмнөд захын Дахия дүүрэгт Хезболлах бүлэглэлийн дэд бүтэц гэж тодорхойлсон байршлуудыг онилж, цохиж эхэлсэн байна. Энэ дүүрэг нь хүн ам шигүү суурьшсан худалдаа, орон сууцны бүс юм.
Цохилтоос өмнө Израилийн арми Бейрутын өмнөд захын ойролцоогоор 500,000 оршин суугчийг нүүлгэн шилжүүлэх тушаал өгчээ. Үүнээс үүдэн хотод үймээн үүсэж, айсан оршин суугчид зугтах гэж оролдон зам дээр урт түгжрэл бий болсон байна.
Дэлхийн олон орны удирдагч, тэр дундаа Францын ерөнхийлөгч Эммануэл Макрон Израилийг дайныг Ливан руу чиглүүлж, өргөжүүлэхгүй байхыг уриалсан ч цохилтууд үргэлжилжээ.
Ливаны Эрүүл мэндийн яамны мэдээлснээр Израилийн довтолгооны улмаас дор хаяж 120 гаруй хүн амь алдаж, 680 гаруй хүн шархадсан байна.
Ойрх Дорнод дахь мөргөлдөөн улам тэлж, Израил Ливанд шинэ фронт нээж, АНУ Ираны эсрэг ажиллагаагаа үргэлжлүүлж, цаашид олон улс татагдан орж, өргөн хэмжээний бүс нутгийн дайн болох магадлалыг нэмэгдүүлж байна.
Сэтгэгдэл (0)
Сэтгэгдэл бичигдээгүй байна