Шуурганы улмаас цасанд дарагдсан нөхрөө эхнэр нь “Find My iPhone” аппыг ашиглан олсон явдал Вашингтонд болжээ. Цасанд дарагдаад дөрвөн цаг гаруй хугацаа өнгөрч, одоо өнгөрлөө хэмээн бодож байсан Майкл Харрис "Тэр миний аврагч" гэж эхнэр Пэннигээ магтсан байна.
Майкл Харрис 2026 оны хоёрдугаар сарын 26-нд Вашингтон мужийн Стивенс Пасс цанын баазад гулгаж байгаад цасан шуурганд дарагдсан бөгөөд тусламж дуудах боломжгүй болсон байна. Түүний эхнэр Пэнни “Find My iPhone” апп-ыг ашиглан нөхрийнхөө байршлыг тогтоож, хэдэн цаг хөдөлгөөнгүй байгаа болохыг нь олж мэдээд аврах баг дууджээ.
Дөрвөн цаг гаруй хугацааны дараа Майклыг аварсан бөгөөд хэд хэдэн гэмтэл авсан түүнийг эмнэлэгт хүргэсэн байна.
Цанаар гулгаж явсан Майкл өөрийгөө аюулд орсныг мэдэрмэгц “Хэн ч миний байршлыг мэдэхгүй байж магадгүй, би өөрөө эндээс гарах боломжгүй” гэж бодсон гэнэ.
Майклын эхнэр Пэнни нөхрийнхөө утас руу залгасан ч хариу өгөөгүй. Тиймээс байршлыг нь “Find My iPhone” апп-ыг ашиглан олохоор шийджээ.
“Ямар нэгэн муу юм тохиолдсон юм биш байгаа гэсэн мэдрэмж төрсөн. Тиймээс би зөн совингоо дагаж, байршлыг нь хянасан, хэд хэдэн удаа шалгаад хөдөлгөөнгүй байгааг нь харсан.” гэж Пэнни ярьсан байна. Бүсгүй тэр даруй цанын бааз руу очиж, аврах багтай холбогджээ. Тэрбээр “Find My iPhone”-оос авсан байршлын мэдээллээрээ нөхрөө олоход тусалсан байна.
Тэр бол хамгийн шилдэг нь, миний аврагч” гэж Майкл эхнэрээ магтсан байна.
Майкл дөрвөн цаг гаруй хугацаанд цасанд дарагдсан байдалтай байсан бөгөөд биеийн хэм нь хэвийн хэмжээнээс буурч гипотермид орсон, уушги нь шингэнээр дүүрсэн, хөл нь хугарсан байсан аж.
Майклын охин Лорен Харрис аав нь эмнэлэгт хэвтсэн, бүх зүйл сайн байвал 14-16 долоо хоногт эдгэрнэ гэж мэдэгдсэн байна. “Тэр амьд үлдэж, амь насанд нь хүрэх гэмтэл аваагүй нь үнэхээр гайхамшиг” гэж Лорен хэлжээ.
Онлайнаар хандив цуглуулдаг платформ болох GoFundMe-д гуравдугаар сарын 4-ний өдрийн байдлаар 29 мянга гаруй ам. доллар цугларсан бөгөөд тус мөнгийг эмнэлгийн зардал болон бусад төлбөрт зарцуулахаар төлөвлөжээ. Лорен аав нь гэр бүлийнхээ гол орлогын эх сурвалж гээд энэ хүнд хэцүү үед тусалсан ойр дотныхон, найз нөхөд, бусад бүх хүмүүст баярласнаа илэрхийлсэн байна.
Сэтгэгдэл (0)
Сэтгэгдэл бичигдээгүй байна