АНУ-ын Төрийн нарийн бичгийн дарга Марко Рубиo Израил улс Ираны эсрэг цохилт хийхээр шийдсэн, үүний улмаас АНУ-ын цэргүүд рүү дайралт ирнэ гэдэг нь тодорхой байсан учир АНУ урьдчилан довтолгоо хийхэд хүрсэн гэж мэдэгджээ. Тэрбээр мөн урьдчилж арга хэмжээ аваагүй бол илүү олон хүний амь үрэгдэх байсан гэсэн юм.
Конгрессын гишүүд Ираны эсрэг үйл ажиллагааны талаарх анхны танилцуулгыг өчигдөр /2026.03.02/ орой сонсжээ. Марко Рубио, Тагнуулын төв газрын дарга Жон Ратклифф, Зэвсэгт хүчний нэгдсэн штабын дарга Дан Кейн нар Конгрессын гишүүдтэй хаалттай уулзалт хийж, Ираны эсрэг үйл ажиллагааны талаарх анхны тайлбар, мэдээллийг өгсөн байна.
Конгресс энэ долоо хоногийн сүүлээр Дайн эрх мэдлийн тогтоолыг хэлэлцэж, Дональд Трампад Ираны эсрэг үйл ажиллагаагаа зогсоох шахалт үзүүлж болзошгүй гэж гэж The Guardian мэдээлсэн байна. Гэхдээ одоогоор Конгрессын гишүүд Ираны эсрэг үйл ажилллагааны талаар ямар байр суурьтай нь тодорхой бус байгаа юм.
Харин Дональд Трамп Ираны эсрэг цэргийн үйл ажиллагаа хэдэн долоо хоног үргэлжлэх магадлалтай гэж мэдэгдээд байна.
Израилийн Ерөнхий сайд Бенжамин Нетаньяху Иран шинэ цөмийн зэвсгийн байгууламж барьж, хэдхэн сарын дараа тэдний довтолгооноос сэргийлэх боломжгүй болох байсан тул яаралтай цохилт хийх шаардлага гарсан гэж мэдэгдсэн. Гэвч Израил-АНУ-ын энэ удаагийн цохилтоор цөмийн байгууламжуудын аль нэгэнд нь гэмтэл учирсан эсвэл довтолгоонд өртсөн гэх мэдээлэл үгүй байна.
Сэтгэгдэл (0)
Сэтгэгдэл бичигдээгүй байна