ИРАНЫ 131 ХОТОД 555 ХҮН АМЬ ҮРЭГДЭЖ, САУДЫН АРАБЫН ГАЗРЫН ТОСНЫ ТОМ ҮЙЛДВЭР АЖИЛЛАГААГАА ЗОГСООВ

Ираны Улаан хавирган сар нийгэмлэг телеграмд Израил–АНУ-ын халдлагын улмаас Ираны 131 хотод нийт 555 хүн амь үрэгдсэн гэж мэдэгджээ.

Тус нийгэмлэгийн мэдээлснээр улс даяар 100 мянга гаруй аврагч бүрэн бэлэн байдалд ажиллаж байгаа бөгөөд ойролцоогоор 4 сая орчим сайн дурынхан халдлагад өртсөн иргэдэд хүмүүнлэгийн үйлчилгээ болон сэтгэлзүйн дэмжлэг үзүүлэхэд бэлэн байгаа гэнэ. 

Саудын Арабын Рас Танура дахь газрын тос боловсруулах үйлдвэр дроны халдлагын дараа үйл ажиллагаагаа зогсоосон тухай мэдээлжээ. Эрх баригчид нисгэгчгүй төхөөрөмжүүдийг сөнөөсөн бөгөөд хүний амь нас хохирсон тухай мэдээлэл байхгүй гэсэн байна. 

Рас Танура цогцолбор нь Ойрх Дорнодын хамгийн том газрын тос боловсруулах үйлдвэрүүдийн нэг бөгөөд өдөрт 550,000 баррель боловсруулах хүчин чадалтай. Тус үйлдвэр хаагдсанаар газрын тосны нийлүүлэлтэд эрсдэл нэмэгдэх магадлалтай байна. Учир нь дэлхийн газрын тосны нийлүүлэлтийн 20 хувь буюу өдөрт 13–15 сая баррель газрын тос дамжин өнгөрдөг Ормузын хоолойгоор тээвэрлэлт өчигдөр хөлөг онгоцуудад халдлага гарсны дараа бараг зогсонги байдалд оржээ.

Мөн Ираны пуужин эсвэл дронууд Персийн булангийн бүс нутаг даяар нисэх буудал, тансаг зочид буудал болон бусад иргэний байгууламжуудад цохилт өгсөн талаар мэдээллүүд гарч байна. Халдлагууд Бахрейн, Ирак, Иордан, Кувейт, Оман, Саудын Араб болон Арабын Нэгдсэн Эмират улсад бүртгэгдсэн бөгөөд энэ нь Персийн булангийн орнуудын Засгийн газруудын зүгээс хүчтэй эсэргүүцэл дагуулж байна.