ОХУ-ын Ерөнхийлөгч Владимир Путин Ираны дээд удирдагч Али Хаменеи АНУ болон Израилийн томоохон агаарын цохилтын үеэр амь үрэгдсэн явдлыг “хүний ёс суртахууны бүх хэм хэмжээг үл тоомсорлосон, олон улсын эрх зүйг ноцтой зөрчсөн хүйтэн цуст аллага” гэж мэдэгджээ.
Путин Ираны Ерөнхийлөгч Масуд Пезешкианд илгээсэн эмгэнэлийн бичигтээ "“Ираны Исламын Бүгд Найрамдах Улсын Дээд удирдагч Сейед Али Хаменеи болон түүний гэр бүлийн гишүүдийн амь насыг бүрэлгэсэн, хүний ёс суртахуун болон олон улсын эрх зүйн бүх хэм хэмжээг үл тоомсорлосон энэхүү аллагатай холбогдуулан гүн эмгэнэл илэрхийлье. Манай улсад Аятолла Хаменеи нь Орос-Ираны найрсаг харилцааг хөгжүүлэх, иж бүрэн стратегийн түншлэлийн түвшинд хүргэхэд асар их хувь нэмэр оруулсан нэрт төрийн зүтгэлтэн хэмээн дурсагдах болно. Та миний чин сэтгэлийн эмгэнэл, дэмжлэгийг Дээд удирдагчийн гэр бүл, ойр дотнын хүмүүс, Ираны Засгийн газар болон нийт ард түмэнд уламжилж өгнө үү” гэсэн байна. .
ОХУ нь Ираны хувьд худалдааны чухал түнш бөгөөд зэвсэг, технологи нийлүүлэгч гол орнуудын нэг юм.
Ираны Ерөнхийлөгч Масуд Пезешкиан мэдэгдэл хийж, Ираны дээд удирдагч Али Хаменеи амь үрэгдсэнтэй холбогдуулан Тегеран хариу өшөө авахыг өөрийн хууль ёсны эрх, үүрэг гэж үзэж байгаагаа илэрхийлжээ.
Тэрбээр Хаменеиг хөнөөсөн явдлыг Израиль болон АНУ дэлхийн бүх лалын шашинтнуудад дайн зарласан хэрэг хэмээн тодорхойлсон байна.
The New York Times сонинд мэдээлснээр Тагнуулын төв газар Хаменеигийн хөдөлгөөн, байршлыг хэдэн сарын турш мөрдөж, хянаж байсан аж. Нийтлэлд дурдсанаар АНУ болон Израиль довтолгооны цаг хугацааг тагнуулын шинэ мэдээлэлд тулгуурлан өөрчилсөн байна.
Сэтгэгдэл (0)
Сэтгэгдэл бичигдээгүй байна