Израилийн цэргийн албан тушаалтан хэвлэлийн хурлын үеэр Израил ба АНУ урьдчилан хэдэн сарын турш төлөвлөсөн Ираны эсрэг хамтарсан ажиллагаа эхлүүлсэн бөгөөд энэ нь өнгөрсөн жилийн зургаадугаар сард болсон Израил-Ираны мөргөлдөөний өмнөх үеийнхээс илүү өргөн цар хүрээтэй зорилготой гэж сэтгүүлчдэд мэдэгджээ.
Тэрбээр Ираныг Израил, АНУ, бүс нутаг болон дэлхийд “асар их аюул” учруулж байгаа гэж тодорхойлж, Израилийн үүрэг нь “Ираны төрийн чадавхыг мэдэгдэхүйц бууруулах, сулруулах” бөгөөд үйл ажиллагаа нь шаардлагатай бол үргэлжилнэ гэжээ. Мөн зорилго нь “ирэх жилүүдэд томоохон өөрчлөлт хийх” гэж тайлбарласан байна.
Албан тушаалтан Ираны дээд удирдагч Али Хаменеи зорилтот жагсаалтад байгаа эсэхийг батлах эсвэл үгүйсгэхээс татгалзаж, Ираны агаарын хамгаалалтын системийг Израилийн анхны цохилтын тэргүүлэх зорилтуудын нэг гэж тэмдэглэжээ.
“Ираны удирдлагуудын ихэнх нь Израилийг устгах болон цэргийн төлөвлөгөө боловсруулах үйл ажиллагаанд оролцдог, тиймээс тэд зорилтот бай болж болно” гэж тэр хэлсэн байна.
Мөн Ираны пуужингийн үйлдвэрлэл хурдтай байгаа болон өнгөрсөн жил учруулсан сүйрлийн дараа цөмийн хөтөлбөрөө дахин урагшлуулах оролдлого хийж байгааг Израил илрүүлсэн гэж мэдээлэв.
“Тэд сар бүр хэдэн арван баллистик пуужин үйлдвэрлэж байгаа бөгөөд үйлдвэрлэлийн хурд улам нэмэгдэж байна” гэжээ. “Энэ нь ирэх жилүүдэд мянга мянган пуужин үйлдвэрлэх чиглэлд урагшилж буй төр юм. Аль хэдийнээс аюултай зэвсгийн нөөцийг өргөтгөж байна” гэж нэмж хэлсэн байна.
Мөн Израиль 70,000 нөөц хүчийг дайчилсан бөгөөд үүнд голчлон агаарын хамгаалалтын ажилтнууд багтсан бөгөөд хилээ ямар ч нөхцөлд хамгаалахын тулд цэргүүдийг байрлуулсан гэж мэдэгджээ.
Ираны төрийн мэдлийн IRNA агентлаг мэдээлснээр, тус улсын өмнөд хэсгийн Хормозган мужийн Минаб хотод Израилийн цохилтод охидын бага сургууль өртсөний улмаас наад зах нь 40 хүн амь алдсан байна.
Мөн дор хаяж 45 хүн гэмтэж бэртсэн тухай мэдээлсэн ч гэмтэл авсан хүмүүсийн талаар дэлгэрэнгүй мэдээлэл өгөөгүй байна.
Ираны Исламын Хувьсгалт Гвардийн (IRGC) цэргийн бааз Минаб хотод байрладаг гэж мэдээлжээ.
Сэтгэгдэл (0)
Сэтгэгдэл бичигдээгүй байна