ТОМ ХЭНКС ӨӨРИЙН ХОЛЫН ХАМААТАН АБРАХАМ ЛИНКОЛЬНЫ ДҮРИЙГ БҮТЭЭНЭ

Том Хэнкс удахгүй гарах кинонд АНУ-ын Ерөнхийлөгч асан, өөрийн холын хамаатан Абрахам Линкольны дүрийг бүтээхээр болжээ.

Тус кино нь бодит дүр төрх болон стоп-моушн анимейшн хольсон хэлбэрээр хийгдэх бөгөөд Хэнксийн шинэ төсөл нь хоёр технологийг хослуулсан өвөрмөц бүтээл болох гэнэ.

Киноны нэр нь Lincoln in the Bardo бөгөөд энэ нь алдарт “Lincoln in the Bardo” номоор бүтээсэн уран бүтээл ажээ. 69 настай Том Хэнкс Абрахам Линкольны дүрийг бүтээх бөгөөд кино нь түрүүн өгүүлсэнчлэн бодит дүр төрх болон стоп-моушн анимейшн хосолсон хэлбэртэй байна.

Филадельфи, Форест Гамп кинонуудад бүтээсэн дүрээрээ Оскарын шагналыг дараалан хүртсэн Том Хэнкс нь АНУ-ын 16 дахь ерөнхийлөгчийн ээж Нэнси Хэнксийн холын хамаатан гэнэ.

Toм Хэнкс гол дүрд тоглохоос гадна өөрийн Playtone студийн хамтран ажиллагч Gary Goetzman-той хамт тус киног продюсерлэхээр болжээ. Киноны найруулагчаар Оскарт нэр дэвшиж байсан Anomalisa киноны найруулагч Жонсон Дюк ажиллана.

Кинонд Линкольны амьдралын хамгийн онцгой мөчүүдийн нэг болох нас барсан 11 настай хүүтэйгээ харилцах харилцааг харуулна. Кино нь хайр энэрэл, гашуудлын үеийн хүний сэтгэл зүй, чадамжийн тухай сэдвийг амьд болон нас барсан, түүхэн болон зохиомол дүрүүдийн тусламжтайгаар хөндөн үзүүлэх юм. 

Tом Хэнкс өмнө нь нэр алдартай бодит хүмүүсийн дүрийг бүтээж байсан туршлагатайг үзэгчид мэднэ. Түүний олон дүрүүдийн дунд 2013 онд Saving Mr. Banks кинонд Уолт Дисней, 2016 оны Sully кинонд Чесли Салленбергер, 2019 онд A Beautiful Day in the Neighborhood кинонд Фред Рожерс нарыг бүтээсэн нь багтдаг. Мөн тэрбээр 2011 онд гарсан телевизийн баримтат драм Killing Lincoln-д тайлбарлагчийн үүрэг гүйцэтгэсэн бөгөөд уг нэвтрүүлэг нь Линкольны алуулсан талаарх үйл явдлыг өгүүлдэг юм.

Том Хэнкс өөрийгөө "Оройн зоогийн үеэр түүхийн талаар хэт их ярьдаг. Эри суваг нь Манхэттэнийг Америкийн эдийн засгийн төв болгосон гэдгийг мэдэх үү гэх мэт асуултаар яриагаа эхэлдэг хүн" гэж 2021 онд Нью Йорк Таймс-т тодорхойлсон. Тэрбээр мөн "миний хийдэг зарим ажил нь түүхэн үндэслэлтэй хөгжилтэй бүтээл гаргах" гэжээ.

Том Хэнксийн цаашид хийхээр зорьж буй төсөлд Toy Story 5 кинонд Вүүдий-н дууг дахин хийх бөгөөд энэ нь театруудад зургадугаар сарын 19-нд гарах юм байна. Түүнчлэн  Дэлхийн II дайны тэнгисийн драм Greyhound-ын үргэлжлэл багтаж байгаа гэнэ.