Уран гулгалтын од, ОХУ-ын тамирчин Камила Валиева их спортод эргэн ирэхээр шийдэж, шинэ үзүүлбэрээ бэлдэж эхэлжээ.
Өдгөө 19 настай тамирчин бүсгүй бэлтгэл сургуулилтаа Светлана Соколовскаягийн удирдлага дор хийж байгаа аж.
Олон улсын спортын арбитрын шүүх (CAS) 2024 оны нэгдүгээр сарын 29-нд Валиеваг допингийн эсрэг дүрэм зөрчсөн гэж үзэн, дөрвөн жилээр тэмцээнд оролцох эрхийг нь хассан. 2021 оны арванхоёрдугаар сарын 25-нд ОХУ-ын аваргын тэмцээний үеэр Валиевагаас авсан шинжилгээгээр хориотой бодис триметазидин илэрснээс үүдэн дээрх шийдвэрийг гаргасан юм.
Арбитрын шүүхийн шийдвэрийн дагуу ОХУ Бээжингийн олимпын аварга цолоо хураалгаж, Валиевагийн авсан 20 оноог хасаж, 54 оноотой болгосноор тэд гуравдугаар байрт бичигдэж, харин АНУ-ын баг аварга болсон. Мөн 2022 оны Европын аваргын тэмцээний дүнг өөрчилж, Камилагийн алтан медалийг нь хурааж, ОХУ-ын аваргын 2021, 2022 оны алт, 2023 оны хүрэл медалиуд зэрэг олон шагнал, тэдгээрийг дагасан мөнгөн шагналыг ч хураасан юм.
Камила Валиеваг сэргээш хэрэглэсэн гэж үзэж, тэмцээнд оролцох эрхийг нь хассан хугацаа энэ 2025 оны арванхоёрдугаар сарын 25-нд дуусаж, албан ёсоор спортдоо эргэн ирэх эрх нь нээгдэж байна. Тэрбээр цоо шинэ үзүүлбэрээрээ мөсөн дээр хэн болохоо дахин хэн болохоо батлахаар шийдэж байгаа гэнэ.
"Камила эргэн ирсэнд бурханд талархъя. Түүний эрүүл мэнд л хамгийн чухал. Тэр суут уран гулгагч. Камила дасгалжуулагчтайгаа гайхалтай үзүүлбэр зохиож, өөрийн шугам, цэвэрхэн гүйцэтгэл, үсрэлтээрээ биднийг баярлуулна гэж бодож байна. Тэгээд бүх зүйл сайхан болно" гэж уран сайхны гимнастикийн Европын аварга Лала Краммаренко ярьжээ.
ОХУ-ын гавьяат дасгалжуулагч Татьяна Тарасова "Би хувьдаа түүнийг эргэн ирж буйд маш баяртай байх болно. Ийм залуу, чадварлаг тамирчин өөртэй нь ямар ч холбоогүй тэнэг зүйлээс болж карьергүй хоцорсон нь ичмээр байсан. Тиймээс бид бусад уран гулгагчдын адил түүнийг дэмжих болно" гэсэн байна.
Сэтгэгдэл (0)
Сэтгэгдэл бичигдээгүй байна