Инстаграмд хамгийн олон дагагчтай, Португалийн хөлбөмбөгийн од Криштиано Роналдо сэтгүүлч, телевизийн хөтлөгч Пирс Морганд ярилцлага өгөх үеэрээ "Дэлхий даяар, тэр ч байтугай жижиг арлуудад ч гэсэн намайг Трампаас илүү мэддэг гэж боддог" гэж хэлжээ.
Криштиано Роналдо Пирс Морганд арван нэгдүгээр сарын 6-нд өгсөн ярилцлагын үеэр түүний алдар нэрийн талаар яриа өрнөсөн байна.
Хөлбөмбөгийн бэлгэ тэмдэг Криштиано Роналдо Дональд Трамп нарын хэн нь алдартай тухай яриа өрнөхөд "Надаас илүү алдартай хэн ч байхгүй" гэж мэдэгдэж, яагаад ингэж зоригтой хариулах болсон шалтгаанаа тайлбарлажээ.
Канадад зургадугаар сард болсон Их долоогийн бүлгийн дээд хэмжээний уулзалтын үеэр Европын зөвлөлийн ерөнхийлөгч Антонио Коста Дональд Трампад Роналдогийн гарын үсэгтэй Португалийн өмсгөл бэлэглэсэн бөгөөд Роналдо ток шоуны хөтлөгчтэй Трампын талаар ярилцах үеэр энэ сэдэв өрнөжээ.
Морган Роналдод хандан "Та бол манай гарагийн хамгийн алдартай хоёр хүний нэг" гэж хэлээд алдарт хөлбөмбөгчин инстаграмд хамгийн олон буюу 650 сая гаруй дагагчтай бол Трампынх 38 сая болохыг дурдсан.
Харин Роналдо "Дональд Трамп бид хоёрын хэн нь илүү алдартай вэ. Дэлхий даяар, жижиг арлуудад ч гэсэн хүмүүс намайг түүнээс илүү мэддэг гэж би боддог. Дэлхий дээр надаас илүү алдартай хэн ч байхгүй гэж бодож байна." гэжээ.
Морган Роналдо, Трамп хоёрын хэн нь илүү алдартай талаарх асуултад "маш сонирхолтой мэтгэлцээн" гэж хэлээд хэрвээ өдгөө амьд байсан бол илүү алдартай байх байсан 3 хүнийг нэрлэжээ. Диана гүнж, хатан хаан Элизабет, Нельсон Мандела нарыг нэрлээд харин одоо бол Дональд Трамп та хоёр байна гэж бодож байна гэсэн байна.
Хөлбөмбөгийн од дараа нь өөрийнхөө алдар нэр, хаа ч явсан түүнийг таньдаг тухай ярьжээ.
Роналдо үргэлжлүүлэн "Би хэзээ ч алдартай болохыг хүсээгүй. Би амжилтад хүрэхийг хүсдэг байсан, багаасаа л од болохоо мэддэг байсан. Гэхдээ ийм алдартай болохыг хэзээ ч хүсээгүй. Энэ уйтгартай, надад итгээрэй, гэхдээ үнэндээ ийм л байна." гэсэн байна.
Сэтгэгдэл (0)
Сэтгэгдэл бичигдээгүй байна