Их Британийн хаан Чарльз тус улсад айлчлал хийсэн Германы Ерөнхийлөгч Франк-Вальтер Штайнмайерт зориулсан хүндэтгэлийн хүлээн авалтын үеэр Уэльсийн гүнж Кейт Миддлтонд хандаж хэлсэн үг олон сая хүнийг “уйлуулжээ”.
Хаан Чарльз тус хүлээн авалт дээр Кейтэд зориулж “Би охиноороо үнэхээр бахархаж байна” хэмээн хэлж, гүн хүндэтгэл үзүүлсэн сэтгэл хөдөлгөм мөчид тэнд байсан бүх хүмүүс амьсгаа даран чимээгүй болсон бол дэлхий даяар үзсэн олон сая хүнийг уйлуулсан байна. Хүлээн авалтад оролцсон хүмүүсийн хэлснээр хаан түүний ач ивээл, тэсвэр хатуужил, хаант засаглалын төлөө тууштай үнэнч байдлыг магтсан энэ мөчид Кейтийн нүд гялалзаж байжээ. Энэ бол зүгээр нэг ёслолын шинж чанартай үг биш, харин чин сэтгэлээс урсан гарсан гэж хүн бүр ярьж байгаа бөгөөд хааны гэр бүл дэх Кэтриний үүрэг нэмэгдэж байгааг харуулсан гэж үзэж байна.
Германы Ерөнхийлөгчид зориулан Виндзор шилтгээнд болсон хүлээн авалтын үеэр Кейт Миддлтон хатан хаан Викториягийн “дорнын” гэгддэг алдарт титмээр гоёсон нь мөн шуугиан дэгдээж байна.
Энэ үзэсгэлэнтэй эрдэнийн титмийг 1853 онд ханхүү Альберт хатан хаан Викторияд зориулан хийлгэсэн бөгөөд Энэтхэгийн үнэт эдлэлээс санаа авсан гэдэг. Титэм нь бадамлянхуа цэцэг, 2600 үнэт чулуугаар чимэглэгдсэн, 17 нумтай байжээ. Эхэндээ уг титэмд хунтайж Альбертийн дуртай эрдэнийн чулуу болох опал буюу гэрэлт чимэд чулуу шигтгэсэн байсан бөгөөд хатан хаан Виктория ижил шигтгээтэй зүүлт, ээмэг, энгэрийн зүүлт захиалан хийлгэсэн байна.
Титмийг өвлөж авсан Александра хатан хожим нь опалыг муу зүйл авчирдаг гэж үзэж, бадмаарагаар сольж, нумыг 11 болгож багасгасан гэдэг.
Уг титмээр ээж нь гоёх дуртай байсан хэдий ч хатан хаан II Элизабет зөвхөн нэг удаа буюу 2006 онд зүүжээ.
Кейт Миддлтон ийнхүү 20 жилийн дараа энэ титмээр гоёсон нь олны анхаарлыг зүй ёсоор татсан юм.
Энэхүү хүлээн авалт нь Германы удирдагчийн сүүлийн 27 жилийн хугацаанд хийсэн анхны төрийн айлчлалд зориулсан хүндэтгэлийн арга хэмжээ байсан. ХБНГУ-ын Ерөнхийлөгч Франк-Вальтер Штайнмайер болон түүний гэргий Элке Бюденбендер нарыг хаан Чарльз III, хатан хаан Камилла, хунтайж Уильям, Кейт Миддлтон болон хааны гэр бүлийн бусад гишүүд хүлээн авсан юм. Зочдын дунд алдарт модель Клаудиа Шиффер болон түүний нөхөр Мэттью Вон, зураач Аксел Шеффлер, шүүгч Моци Мабусе, хөлбөмбөгчин Томас Хитцлспергер нар багтжээ.
Сэтгэгдэл (0)
Сэтгэгдэл бичигдээгүй байна