АНУ-ын Ерөнхийлөгч Дональд Трамп Конгресст илтгэл тавихаас нэг өдрийн өмнө нийтлэгдсэн судалгаа тэрбээр Бүгд Найрамдах намын дэмжигчдийнхээ дунд ч дэмжлэгээ алдаж байгааг харуулсан байна.
АНУ-ын насанд хүрсэн иргэдийн ихэнх нь Дональд Трампыг хоёр дахь удаагийн ерөнхийлөгчийн бүрэн эрхийн хугацаандаа улс орныг буруу чиглэлд хөтөлж байна гэж үзэж байгааг шинэ санал асуулга харуулжээ. Энэхүү NPR / PBS News / Marist Poll-ийн хамтарсан судалгаа нь түүний Конгресст тавих “Улс орны байдлын тухай” илтгэлийн өмнөх өдөр нийтлэгдсэн байна.
Нийт насанд хүрэгчдийн 55 хувь нь Трамп улс орныг улам дордуулж байна гэж үзсэн бөгөөд энэ нь түүний эхний бүрэн эрхийн хугацааны мөн үеийнхтэй харьцуулахад 13 нэгжээр өссөн үзүүлэлт аж. Судалгааг нэгдүгээр сарын 27-30-ны хооронд явуулжээ.
Ийм байр суурьтай хүмүүсийн тоо өнгөрсөн оны дөрөвдүгээр сараас хойш дөрвөн нэгжээр нэмэгдсэн байна.
Ерөнхийлөгчийн талаарх санал асуулгын дүн намын шугамаар тодорхой хуваагджээ. Тухайлбал, Ардчилсан намын дэмжигчдийн 90 хувь нь улс орон нэг жилийн өмнөхөөс дордсон гэж үзсэн бол Бүгд Найрамдах намын дэмжигчдийн 82 хувь нь нөхцөл байдал сайжирсан гэж хариулсан байна.
Мөн засаглалын ардчилсан тогтолцоонд итгэх итгэл түүний хоёр дахь бүрэн эрхийн эхний жилд буурчээ.
2025 оны гуравдугаар сард АНУ-ын насанд хүрэгчдийн 43 хувь нь “Ерөнхийлөгч, Конгресс болон шүүхийн хооронд эрх мэдлийг хуваарилсан хяналт-тэнцлийн тогтолцоо сайн ажиллаж байна” гэсэнтэй санал нийлж байжээ. Харин шинэ судалгаагаар ердөө 32 хувь нь ийм байр суурь илэрхийлсэн байна.
Мөн нэгдүгээр сард явуулсан Pew Research Center-ийн судалгаагаар Трампын хоёр дахь бүрэн эрхийн хугацаанд хэрэгжүүлж буй арга хэмжээнүүд иргэдийн дэмжлэгийг авахгүй байгаа нь харагджээ. АНУ-ын насанд хүрэгчдийн ердөө 27 хувь нь түүний бодлого, төлөвлөгөөний ихэнхийг эсвэл бүгдийг нь дэмжиж байгаагаа илэрхийлсэн байна.
Тэрбээр Бүгд Найрамдах намын дэмжигчдийн дунд ч тодорхой хэмжээнд дэмжлэгээ алдсан нь судалгааны дүнгээс харагджээ. 2025 оны хоёрдугаар сард өөрсдийгөө Бүгд Найрамдах намын гишүүн эсвэл тус намыг дэмжигч гэж тодорхойлсон хүмүүсийн 75 хувь нь түүнийг Ерөнхийлөгчийн үүргийг гүйцэтгэхэд шаардлагатай оюун санааны чадамжтай гэж үзэж байжээ. Харин нэгдүгээр сард энэ үзүүлэлт 66 хувь болж буурсан байна.
Мөн Трамп албан тушаалаа ёс зүйтэйгээр хашиж байна гэж үздэг Бүгд Найрамдах намынхны хувь дээрх хугацаанд 55 хувиас 42 хувь болж буурчээ.
Сэтгэгдэл (0)
Сэтгэгдэл бичигдээгүй байна