АНУ-ын Ерөнхийлөгч Дональд Трамп Колумбын зүүний үзэлтэй Ерөнхийлөгч Густаво Петрогийн талаар хийсэн мэдэгдлийн тухай дэлхийн олон хэвлэлүүд мэдээлж байна. Трамп Колумбыг “өвчтэй хүн удирдаж байна” хэмээн хэлж, түүнийг АНУ-д кокаин үйлдвэрлэж, нийлүүлдэг гэж буруутгаад “Тэр үүнийг удаан хугацаанд хийхгүй” гэж хэлжээ.
Ням гарагт Air Force One онгоцон дээр сэтгүүлчидтэй ярьж байх үеийн аудио бичлэгт нэгэн сурвалжлагч “Колумбд АНУ ажиллагаа явуулах гэсэн үг үү” гэж асуухад Трамп “Надад бол боломжийн санаа сонсогдож байна” гэж хариулсан байна.
АНУ болон Колумбын хооронд Карибын тэнгист АНУ цэргийн хүчээ нэмэгдүүлснээс хойш хэдэн сарын турш хурцадмал байдал үргэлжилж байгаа бөгөөд Петро нь Трампыг хамгийн хатуу шүүмжилдэг гадаадын удирдагчдын нэг юм.
Колумбын Ерөнхийлөгч Густаво Петро түүний Засгийн газар кокаиныг урьд өмнө байгаагүй их хэмжээгээр хураан авч байгаа гэж мэдэгдсэн бөгөөд өнгөрсөн сард дэлхийн хамгийн том кокаин үйлдвэрлэгч орон болох Колумбд хүрэлцэн ирж, мансууруулах бодис үйлдвэрлэдэг лабораториудыг устгах Засгийн газрын хүчин чармайлтыг нүдээрээ хараач хэмээн Трампыг урьжээ.
Амралтын өдрүүдэд Петро АНУ-ын Венесуэлд явуулж буй ажиллагааг Латин Америкийн "тусгаар тогтнолд халдсан явдал” бөгөөд энэ нь хүмүүнлэгийн хямралд хүргэнэ гэж мэдэгдсэн юм.
Петро АНУ-ын Венесуэлийн эсрэг явуулж буй кампанит ажил, мөн Карибын тэнгис болон Номхон далайд жижиг завиудыг “онилж” буйг шүүмжилсэн нь Трампын уурыг хүргэж, тэрбээр бямба гарагт Колумбын удирдагчид хандан “өөрийгөө бодож, болгоомжлох хэрэгтэй” гэж “сануулсан” байна.
Сэтгэгдэл (0)
Сэтгэгдэл бичигдээгүй байна