Тооны хичээлээр толгой цохидог "Соёмбо" бага сургуулийн захирал, Боловсролын ухааны доктор Г.Батбаяр "Дүрс хуваах, эвлүүлэх" номоо хэвлүүлжээ.
Гуч гаруй жил бага ангийн багшаар ажиллаж, олон хүүхдийг математикийн олимпиадад бэлтгэж, амжилтад хүргэсэн Г.Батбаяр багш "Бага ангийн математикийн стандарт бус бодлого, түүний арга зүйн шийдэл" сэдвээр Боловсролын ухааны докторын зэрэг хамгаалсан хүн юм.
Хүүхдэд бүтээлч даалгавар өгч байж бүтээлчээр сэтгэнэ гэж үздэг тэрбээр өөрийн туршлагад үндэслэн "Дүрс хуваах, эвлүүлэх" номоо гаргасан байна. Номын өмнөтгөлд ""Дүрс хуваах, эвлүүлэх нь бага ангийн суралцагчдын хамгийн бодох дуртай бодлого байдаг. Иймд энэ төрлийн бодлогыг тэдний тоо бодох сонирхол, сэдлийг өдөөх нэгэн хэрэгсэл гэж үзэж болох юм." гэж бичжээ. Энэхүү эмхэтгэлд хүнд, хөнгөн янз бүрийн түвшний 500 гаруй бодлогыг 8 бүлэгт хувааж оруулжээ. Сонирхолтой нь олон янзаар хувааж болох дүрсийн зөвхөн нэг хуваалтыг үзүүлж, бусад хувилбарыг уншигчдад "үлдээсэн" байна.
Математикийг хэцүү гэж олон хүн боддог. Гэхдээ дүрс хуваах, эвлүүлэх нь хүүхдэд тоглоом шиг ч юм шиг санагдаж, сэтгэхүйг хөгжүүлдэг "идтэй" билээ. Мөн гадаадын их, дээд сургуулиудад суралцахад математикийн хичээл нэг шалгуур болдгийг сануулахад илүүдэхгүй байх. Тус номыг Нарны хорооллын урд, UG arena-ийн зүүн талд байрлах "Соёмбо" сургуулиас авах боломжтой.
Сэтгэгдэл (0)
Сэтгэгдэл бичигдээгүй байна