АНУ-ын мисс Йолина Линдквист дэлхийн өнцөг булан бүрээс ирсэн 70 оролцогчийг ялж, бүтэн сар орчим үргэлжилсэн “MISS COSMO” тэмцээний ялагчийн титмийг хүртжээ.
Йолина Линдквист 22 настай, 1.74 м өндөр, Өмнөд Иллинойсын их сургуулийг онц дүнтэй төгссөн. Олон нийттэй харилцах, хүний нөөцийн чиглэлээр ажилладаг тэрбээр оюутны байгууллагыг удирдаж, 16 орноор аялсан байна.
Эцсийн шатанд шалгарсан хоёр оролцогчийг тодруулсан мэтгэлцээнд Йолина Линдквист хорт хавдартай өвчтөнүүд болон тэдний гэр бүлийг сурталчлах, дэмжих зорилготой "Хорт хавдрын эсрэг зориг" олон нийтийн төслөө танилцуулжээ. Сүүлийн нэг жилийн хугацаанд тэрбээр Хантсманы хорт хавдар судлалын санд зориулж, 20,000 гаруй доллар цуглуулсан байна. Цаашдаа Хантсман Хавдрын Хүрээлэн зэрэг нэр хүндтэй байгууллагуудтай хамтын ажиллагаагаа өргөжүүлэхийн зэрэгцээ дэлхий даяар хорт хавдрын өндөр түвшинтэй нийгэмлэгүүдэд арга хэмжээ зохион байгуулахын зорьж буй аж. Зөвхөн хандив цуглуулахаас гадна өвчинд нэрвэгдсэн гэр бүлүүдийг дэмжих, үр дүнтэй эмчилгээ олох судалгаанд урт хугацааны хөрөнгө оруулалт хийх нь чухал гэдгийг тэр тэмдэглэжээ. "Төслийн зорилго бол "Би хорт хавдартай" гэсэн үгийг хэн ч дахин сонсохгүй байх явдал юм" гэж тэр дүгнэсэн бөгөөд үзэгчид алга ташин хүлээж авчээ.
Йолина Линдквистийн ялалтыг олон хүн дэмжиж байгаа аж. Тэрбээр тэмцээний туршид сайн байж, гэрэлтсэн инээмсэглэлээрээ олны анхаарлыг татсан. Вьетнамын Хо Ши Мин хотод болсон тэмцээний үеэр Америкийн гоо бүсгүй эх хэлээр нь энгийн мэндчилгээ ашиглан чөлөөтэй харилцаж, үзэгчдийн сэтгэлийг хөдөлгөсөн бөгөөд вьетнам шүтэн бишрэгчид түүнд нэр ч өгөөд амжсан гэнэ.
Тэмцээний дэд байрт Филиппиний мисс Челси Фернандес орсон байна. Тэрбээр 25 настай, Азийн хөгжлийн сангийн коллежид нэвтрүүлэгч мэргэжлээр суралцдаг, 2022 онд Филиппиний миссийн титмийг хүртэж байсан. Челси тэмцээний эхнээс л шилдэг өрсөлдөгчөөр тодорч, үзэгчдээс хамгийн олон санал авч, шилдэг үдшийн даашинзны шагналыг хүртсэн юм.
Сайгон голын эрэг дээрх Creative Park-д гадаа болсон уг арга хэмжээг 20000 хүн үзэж, AXN YouTube-ээр шууд дамжуулсныг үзэгчдийн тоо 650 мянга давжээ.
Сэтгэгдэл (0)
Сэтгэгдэл бичигдээгүй байна