ОХУ, АНУ-ын хэлэлцээр ахиц дэвшилгүй дууссан бөгөөд В.В.Путин ОХУ Европтой дайн хийхэд бэлэн гэж мэдэгдлээ.
ОХУ-ын Ерөнхийлөгч Европын эрх баригчдыг энх тайвныг сүйтгэж байна гэж буруутгаж байгаа тул Трампын элч Виткоффтой хийсэн яриа хэлэлцээний дараа Украины хямралыг шийдвэрлэхэд ахиц гараагүй гэж түүний ахлах туслах Ушаков хэлжээ.
ОХУ, АНУ-ын хэлэлцээрийн үеэр Украины асуудлаар ахиц дэвшил гарсангүй гэж Юрий Ушаков ОХУ-ын Ерөнхийлөгч Европтой дайн хийхэд бэлэн гэж мэдэгдсэнээс хойш хэдэн цагийн дараа хэлсэн байна.
Ушаков Оросын хэвлэлд өгсөн ярилцлагадаа, Трампын элч Стив Виткофф болон Трампын хүргэн Жаред Кушнер нартай таван цаг үргэлжилсэн уулзалтын дараа хоёр тал Украины хямралыг шийдвэрлэх талаар тохиролцоонд хүрээгүй, хийх ажил их байна гэж мэдэгджээ.
Уулзалтыг "маш ашигтай, бүтээлч, мэдээлэл сайтай" гэж Ушаков хэлсэн ч хоёр тал үндсэн асуудлууд, тэр дундаа Орос, Украины хооронд байгуулах энхийн хэлэлцээрийн нутаг дэвсгэрийн хяналтын асуудлын талаар тохиролцоонд хүрч чадаагүй гэв.
Ушаков АНУ-ын талаас танилцуулсан энхийн төлөвлөгөөний талаар "Бид АНУ-ын тодорхой саналуудыг хэлэлцээгүй, харин эдгээр баримт бичигт тусгасан зүйлийн мөн чанарыг хэлэлцсэн" гэжээ. "Бид зарим зүйлтэй санал нийлж болох юм. Ерөнхийлөгч ч гэсэн хэд хэдэн саналд шүүмжлэлтэй, тэр байтугай сөрөг хандлагатай байгаагаа нуугаагүй” гэж хэлсэн байна.
Хэлэлцээрийн зарим асуудлыг ил болгож ярихгүй гэж Ушаков хэлээд Трамп, Путин хоёрын хооронд дахин дээд хэмжээний уулзалт ойрын үед хийхгүй гэж мэдэгдэв.
Виткофф, Кушнер нар Кремльд хэлэлцээ хийхээр хүрэлцэн ирэх үеэр Путин Европын гүрнүүдийг буруутгаж, тэд Украин дахь энх тайвныг эвдэн сүйтгэж байна, дайныг зогсоох тухай "Европын шаардлага"-ыг "Орос хүлээж авах боломжгүй мэдэгдсэн юм.
"Европ АНУ-ын засаг захиргаанд Украины асуудлаар энх тайван тогтооход саад болж байна" гэж Путин хэлээд "Орос Европтой дайтах бодолгүй байгаа, гэхдээ Европ эхэлбэл бид яг одоо бэлэн байна" гэжээ.
Путин Европын чухам ямар шаардлагыг хүлээн зөвшөөрөх боломжгүй гэж үзсэн талаараа тодорхой зүйл дурдаагүй ч "Тэд дайны талд байна" гэж хэлсэн юм.
Виткофф энэ жил Москвад зургаа дахь удаагаа айлчилж буй бөгөөд Оросын өндөр албан тушаалтны саналаар боловсруулсан АНУ-ын энхийн саналын шинэчилсэн хувилбарыг Путинд танилцуулж, улмаар Украйныг зөвшөөрүүлэхийн тулд дахин шинэчилжээ.
Украины Ерөнхийлөгч Владимир Зеленский ОХУ аливаа буултыг хүлээн авахад бэлэн гэдэгт ихээхэн эргэлзсэн хэвээр байгаагаа онцолсон юм.
ОХУ-ын Ерөнхийлөгчтэй хийсэн уулзалтын дараа Зеленский Виткофф, Кушнер нартай Европт уулзах төлөвтэй байна гэж АНУ-ын хэд хэдэн хэвлэлд мэдээлсэн байна.
Трампын хоёр холбоотон өнгөрсөн мягмар гарагт Украйны албаны хүмүүстэй Флорида мужид уулзаж, Москвад таалагдсан 28 зүйл бүхий энхийн төлөвлөгөөнд өөрчлөлт оруулах талаар ярилцсаны дараа ОХУ-д хүрэлцэн ирсэн юм.
Зеленский анхны төлөвлөгөөнд өөрчлөлт оруулахад Европын гүрнүүдийн дэмжлэгийг авах дипломат оролдлого хийж, саналын шинэчилсэн хувилбар нь "сайн харагдаж байна" гэсэн хэдий ч "хараахан дуусаагүй" гэж онцолжээ.
Зеленский 28 зүйл бүхий төлөвлөгөөн дэх Украиныг одоогийн хяналтад байгаа зүүн хэсгийн газар нутгаасаа татгалзах, зэвсэгт хүчнийхээ хэмжээнд хязгаар тогтоохыг шаардсан заалтуудыг эсэргүүцэж байгаа юм. Тэрбээр цаашдаа Оросын түрэмгийллээс урьдчилан сэргийлэхийн тулд баруунаас тодорхой, хэрэгжүүлэх боломжтой аюулгүй байдлын баталгааг шаардаж буй.
Путин өөрийнх нь хувьд зөвхөн АНУ-ын анхны санал л цаашдын яриа хэлэлцээний үндэс болж чадна, гэхдээ томоохон засвар хийх шаардлагатай гэж мэдэгдсэн.
Сүүлийн долоо хоногт АНУ-ын энх тайвны төлөвлөгөөнд хэд хэдэн нэмэлт өөрчлөлт оруулж, ажиллагаа эрчимтэй явагдаж байгаа хэдий ч ОХУ, Украйны саналын зөрүү арилгахад хэцүү хэвээр байгаа.
Трамп мягмар гарагт болсон Засгийн газрын хуралдаан дээр хэлсэн үгэндээ Украины дайн бол "эмх замбараагүй байдал" бөгөөд шийдвэрлэхэд хялбар нөхцөл байдал биш гэжээ.
Путины хэлсэн үг Вашингтон болон Европын орнуудын хооронд хагарал үүсгэх зорилготой гэж зарим хүн үзэж байна. Европын албан тушаалтнууд АНУ-ын анхны төлөвлөгөөг эсэргүүцэн тодорхой амжилтад хүрсэн ч Вашингтон тэдний санаа зовнилыг хэр зэрэг хэмжээнд авч үзэж буй нь тодорхойгүй хэвээр байна.
Кремлийн хэвлэлийн төлөөлөгч Дмитрий Песков хэлэлцээрийн өмнө Путин, Виткофф нар Вашингтон, Киев хоёрын хооронд саяхан тохиролцсон "ойлголцол"-ын талаар ярилцах бөгөөд ОХУ яриа хэлэлцээрт бэлэн хэвээр байгаа ч "тусгай ажиллагааныхаа" зорилгод хүрэхийг шаардах болно гэж байсан билээ. Эдгээр зорилтууд нь Украины бүрэн эрхт байдлыг эрс алдагдуулж магадгүй бөгөөд зэвсэгт хүчнийхээ тоог эрс цөөрүүлэх, барууны цэргийн тусламжийг хориглох, улс төрийн тусгаар тогтнолыг хязгаарлах, тус улсын зүүн хэсэгт Украины хяналтад байгаа газар нутгийг шилжүүлэх зэрэг өргөн хүрээтэй шаардлагууд юм.
Москвад АНУ-ын төлөөлөгчидтэй хийх хэлэлцээний өмнөхөн Путин Оросын арми Украины стратегийн ач холбогдолтой Покровск хотыг хяналтдаа авсан гэж мэдэгдсэнийг Украйн няцаасан. Гэхдээ Украины шинжээчид болон цэргийн блогчид Орос одоо Покровск хотын ихэнх хэсгийг эзэмшиж байгааг хүлээн зөвшөөрч, байлдааны талбарын газрын зурагт цэргүүдээ хяналтдаа байлгаж байгааг харуулсан байна.
Фронт дахь сүүлийн үеийн ололт амжилтад сэтгэл хангалуун байсан Путин сүүлийн хэдэн долоо хоногт Оросын арми энхийн хэлэлцээр гацвал тулалдаанд бэлэн байгаагаа илэрхийлж, түүний хүчнүүд довтолгоогоо үргэлжлүүлсээр байгааг дахин онцолжээ.
Сүүлийн өдрүүдэд Киев Хар тэнгис дэх Оросын сүүдрийн флотын хэд хэдэн хөлөг онгоцонд цохилт өгсний дараа В.Путин Украины боомт, усан онгоцны эсрэг хариу арга хэмжээ авна гэж сүрдүүлсэн юм.
"Путины дуртай сонин" гэж нэрлэгддэг "Комсомольская правда"-д Ерөнхийлөгчийн хэлсэн үг "Украины улам олон газар нутаг бидний мэдэлд орж байгаа бөгөөд дараагийн удаад Оросын хийх алхам илүү хатуу байж магадгүй." гэж бичсэн байна.
Уг сонинд сүүлийн хэлэлцээг Киев бууж өгөхөөс татгалзсанаар мухардалд орсон гэжээ. "АНУ сүүлийн 10 хоногт Украинд шахалт үзүүлэхийг гурав дахь удаагаа оролдсон ч Вашингтон дахин бүтэлгүйтлээ" гэсэн байна.
.
Сэтгэгдэл (0)
Сэтгэгдэл бичигдээгүй байна