УЛААНБААТАР БРИТИШ СУРГУУЛЬ СУРАГЧДЫГ ТЭТГЭЛГЭЭР СУРГАНА

-ТЭТГЭЛЭГТ ХАМРАГДАХ СУРАГЧИЙН МАТЕРИАЛЫГ 15-НЫ ӨДӨР ХҮРТЭЛ АВНА-

Жүжигчин Аглуугийн охин Б.Биндэрьяа Англи, АНУ, Австрали, Канадын дэлхийн ТОП арав гаруй сургуулиас тэтгэлэг авсан талаар мэдээлэл нийтлэгдсэн. Б.Биндэрьяа нь Улаанбаатар дахь Бритиш сургуулийн 13 дугаар ангийн сурагч юм. Дашрамд дурдахад тус сургууль хүүхдийг 5 настайгаас нь авч 13-р анги төгсгөдөг байна.
Нэлээд өндөр төлбөртэйд тооцогддог уг сургууль суралцах чин хүсэл эрмэлзэлтэй сурагчдыг 2024-2025 оны академик тэтгэлэгт материалаа ирүүлж, оролцохыг урьжээ. Энэ тэтгэлэг нь дунд болон ахлах ангийн сурагчдад дэлхийд танигдсан Англи Уэльсийн боловсрол олгож, Монголын ирээдүй болсон залуу үеийг дэмжих зорилготой бөгөөд тэтгэлэгт тэнцсэн сурагчид 40, 70, 100 хувийн төлбөрийн хөнгөлөлттэй суралцах боломжтой аж.
Тэтгэлэгт хамрагдах сурагч нь сүүлийн 2 жилийн хичээлийн голч дүн 90-ээс дээш хувьтай, англи хэлний дундаас дээш болон гүнзгий шатны мэдлэгтэй байх зэрэг хэд хэдэн шалгуур тавигдах юм байна. Мөн ирээдүйн хараа, зорилго төлөвлөгөөгөө тодорхойлсон англи хэл дээрх эссэ ирүүлэх шаардлагатай аж. Тэтгэлгийг олгох шалгаруулалт гурван үе шаттай явагдана. Тэтгэлэгт хамрагдахыг хүссэн сурагчид материалаа 2024 оны 3-р сарын 15-ны баасан гаригийн 17:00 цаг гэхэд Улаанбаатар дахь Бритиш Сургууль дээр биечлэн эсвэл шуудангаар, хүргүүлэх шаардлагатай ажээ.