Ойрын арван жилд дэлхий даяар хойч үедээ өвлүүлэх 70 гаруй сая доллар буюу 53 сая фунт стерлингийн өв хөрөнгө тэгш бус байдлыг улам бүр нэмэгдүүлнэ гэж эдийн засагчид анхааруулж байна.
Баян ба ядуугийн хоорондох дэлхийн баялгийн ялгааны талаарх тайланд "Их хорь" үүнд хөндлөнгөөс оролцох шаардлагатай байгааг онцолсон гэж шинжээчид хэлж байна.
Өмнөд Африкийн Йоханнесбургт болох Их хорийн уулзалтын өмнөх тайланд байнгын хяналтын бүлэг байгуулахгүй бол ирэх арван жилийн хугацаанд дэлхийн баялгийн ялгаа улам бүр нэмэгдэнэ гэж шинжээчдийн зөвлөл мэдэгдсэн талаар тусгажээ.
Нобелийн шагналт эдийн засагч Жозеф Стиглиц Өмнөд Африкийн ерөнхийлөгч Сирил Рамафосагийн захиалгаар хийсэн тайлангийн дүнгээ танилцуулахдаа дэлхийн 10 орны наймд нь тэгш бус байдал нэмэгдэж байгааг онцолсон аж.
Дэлхийн хүн амын 90 хувийг бүрдүүлдэг нийт улс орнуудын 83 хувь нь тэгш бус байдлын өндөр түвшинд байна гэж тайланд дурджээ. Тэгш бус байдал өндөртэй орнууд ардчиллын доройтолд орох магадлал тэгш байдлыг хангасан бусад орноос долоо дахин их байна гэсэн байна.
Рамафоса "бие даасан шинжээчдийн онц хорооны" тайлангаас үзвэл Өмнөд Африкт болох Их хорийн уулзалтын үеэр хэлэлцэх асуудалд тэгш бус байдлыг оруулах шаардлагатай гэжээ.
Баян хоосны ялгааг хянах өндөр түвшний шинжээчдийн зөвлөл байх шаардлагатайг дэмжээгүй ч тэрбээр "Тэгш бус байдал нь хүртээмжтэй өсөлтөд саад болж байгаа бөгөөд ардчилалд заналхийлж байгаа явдал юм. Тэгш бус байдлыг шийдвэрлэх нь бидний үе үеийн тулгамдсан асуудал. Үүнийг бууруулахын тулд ухаалаг, бодитой алхам хийх хэрэгтэй.” гэсэн байна.
Их хорь нь 2008 оны банкны хямралын дараа байгуулагдсан бөгөөд дэлхийн хамгийн баян улсуудын Их долоо бүлгийн өргөжүүлсэн хэлбэр юм. Үүнд дэлхийн 19 орон, дээр нь Европын холбоо багтдаг.
Энэ сарын 22-нд болох Сайд нарын уулзалтаас өмнө тэгш бус байдлыг хянах хэсэг байгуулах шаардлагыг Их хорийн хэд хэдэн улс дэмжиж, кампанит ажил өрнүүлж байна.
Колумбын Их Сургуулийн профессор, бие даасан шинжээчдийн дарга Стиглиц "Их хорь”-д "хөгжлийн чиг хандлагыг хянаж, үр дагаврыг нь үнэлж, түүнийг шийдвэрлэх өөр бодлогыг үнэлж, Засгийн газар, бодлого боловсруулагчид болон олон улсын хамтын нийгэмлэгт мэдээлэл өгөх" байнгын хороо байгуулахыг зөвлөж байна гэжээ.
Стиглиц судалгаагаар баян ядуугийн ялгаа ихсэж, ардчиллын институцийг сүйрүүлж, популизмыг өдөөж байгааг харуулж байна гэсэн байна.
Тайланд тусгаснаар 2000-2024 оны хооронд дэлхийн хамгийн баян 1 хувь нь бүх шинэ баялгийн 41 хувийг эзэмшсэн бол доод түвшний 50 хувьд баялгийн ердөө 1 хувь нь очжээ.
Италийн эдийн засагч Сальваторе Мореллигийн хийсэн шинэ судалгаанаас үзэхэд 2035 он гэхэд 70 орчим тэрбум долларын баялаг хойч үед өвлөгдөх юм.
“Нийлмэл хүү нь баялгийг өсгөж, өв залгамжлалын татвар нь үр дүнтэй бишээс баялгийг үеэс үед дамжуулж, эдийн засгийн үр ашгийг алдагдуулж байгаа тул баялгийн тэгш бус байдал нэмэгдэж байна” гэсэн байна.
Сэтгэгдэл (0)
Сэтгэгдэл бичигдээгүй байна