Луврын музейн хулгайн хэрэгт дахин хоёр хүнийг баривчилснаар яллагдагчийн тоо 4 болж байна.
76 сая фунт стерлинг буюу 88 сая еврогийн үнэт эдлэл хулгайлсан хэргээр 38 настай эмэгтэй, 37 настай эрэгтэй хоёрыг өнгөрсөн лхагва гарагт баривчилжээ. Тэднийг яллагдагчаар татаж, цагдан хорьсон гэж прокурорууд мэдэгдсэн байна. Ингэснээр тус хэрэгт яллагдагчаар татагдсан хүмүүсийн тоо дөрөв болж байгаа юм.
Дээрх эмэгтэй, эрэгтэй хоёрыг өөр гурван хүний хамт лхагва гарагт баривчилсан ч үлдсэн гурвыг нь суллажээ.
Баривчлагдсан эмэгтэй шүүхэд хүүхэд болон өөрийнхөө төлөө айж байгаагаа хэлээд нулимс дуслуулж байсан гэж Франс Пресс мэдээлжээ. Түүнийг зохион байгуулалттай хулгайн гэмт хэрэгт хамтран оролцсон, гэмт хэрэгт бэлтгэх зорилгоор гэмт хэргийн бүлэглэл зохион байгуулсан гэх үндэслэлээр буруутгаж байгаа юм.
Францын нийслэл хотын хойд захын Ла Курневт амьдардаг эмэгтэйг "хуйвалдаан хийх эрсдэлтэй" болон "нийгмийн хэв журам алдагдуулсан" гэсэн үндэслэлээр шүүгч саатуулсан байна. Баривчлагдсан эрэгтэйг мөн зохион байгуулалттай хулгай хийсэн, гэмт хэрэг үйлдэхэд бэлтгэх зорилгоор гэмт хэргийн бүлэглэл зохион байгуулсан хэрэгт буруутгаж байгаа талаар Парисын прокурор мэдэгдэв. Тэрбээр өмнө нь хулгайн гэмт хэргээр хууль хяналтын байгууллагад “танигдсан” нэгэн гэх мэдээлэл байна. Түүнийг ойрын өдрүүдэд болох шүүх хурал хүртэл цагдан хорих таслан сэргийлэх арга хэмжээ авсан гэж прокурор нэмж хэлэв. Тэд энэ үйл явдалд оролцоогүй гэж өөрсдөө мэдүүлсэн байна.
Дэлхийд хамгийн их хүн үздэг Луврын музейгээс өнгөрсөн сард гэмт этгээдүүд үнэлж баршгүй эрдэнэс хулгайлахдаа ердөө долоохон минут зарцуулсан юм.
Цагдан хоригдсон эмэгтэйн өмгөөлөгч Адриен Соррентиногийн хэлснээр үйлчлүүлэгч нь тус хэрэгт өөрийгөө гэм буруугүй гэж үгүйсгэж байгаа гэнэ. Мөн сэтгэлээр унасан байгаа гэж өмгөөлөгч нь сэтгүүлчдэд хэлжээ.
Тэдэнтэй цуг баривчлагдаад суллагдсан хүмүүсийн нэгний өмгөөлөгч София Бугрин баривчилгааг ялгаварлан гадуурхах шинжтэй байсан гэж шүүмжилсэн байна.
Луврын музейгээс хулгай хийсэн хэрэгт өмнө нь баривчлагдсан хоёр эрэгтэй Парисын зүүн хойд хэсэгт орших Обервильерс хотод амьдарч байсан. Нэг нь Францад амьдардаг 34 настай алжир залуу бөгөөд хулгайч нарын хэрэглэсэн скүүтерүүдийн нэгээс түүний ДHК-ийн ул мөрийг олж тогтоосон байна. Хоёр дахь хүн нь 39 настай, такси зөвшөөрөлгүй жолооддог нэгэн бөгөөд хоёулаа хулгай хийдгээрээ цагдаад бүртгэгдсэн хүмүүс юм байна. Эхнийхийг Парисын Шарль де Голлийн нисэх онгоцны буудал дээрээс Алжир руу нисэх онгоцонд суух гэж байхад нь, хоёр дахийг нь гэрийнх нь ойролцоогоос баривчилсан. 39 настай эрийн тухайд гадаад руу явахаар төлөвлөж байсан гэх нотлох баримт байхгүй гэж прокурорууд мэдэгдсэн байна.
Ийнхүү дөрвөн хүнийг яллагдагчаар татаад байгаа ч хулгайд алдагдсан эд зүйлс олдоогүй хэвээр байна.
Хулгайчид зугтаж явахдаа нэгэн цагт III Наполеоны эхнэр Евгений хатан хааны эзэмшиж байсан алмааз, маргад эрдэнийн шигтгээтэй титмийг музейн гадаа гээснийг цагдаагийнхан олсон. Гэмт этгээдүүд үүнээс гадна найман үнэт эдлэл авч зугтсан нь өдгөөг хүртэл олдоогүй байна. Тэдгээрийн дотор I Наполеоны хоёр дахь эхнэр Мари-Луиздаа бэлэглэсэн маргад эрдэнийн зүүлт, 2000 шахам очир алмаазаар чимэглэгдсэн Евгений хатан хааны зүүлт зэрэг багтжээ. Дотоод хэргийн сайд Лоран Нуньес Францын өдөр тутмын Le Parisien сонинд: "Бид хулгайд алдсан эд зүйлийг олж чадна гэдэгт итгэлтэй байна" гэсэн байна.
Сэтгэгдэл (0)
Сэтгэгдэл бичигдээгүй байна