АНУ ДҮРВЭГСДИЙН ТООГ 7500-ААР ХЯЗГААРЛАЖ, ӨМНӨД АФРИКИЙН ЦАГААН АРЬСТНУУДАД ДАВУУ ЭРХ ОЛГОНО

Дайн, хавчлага хавчлагаас зугтсан хэдэн зуун мянган хүнийг “хүлээн авдаг” байсан АНУ энэ тоогоо огцом бууруулах нь.

Трампын засаг захиргаа ирэх 2026 онд АНУ-д хүлээн авах дүрвэгсдийнхээ тоог ердөө 7500-д хязгаарлахаар төлөвлөж байгаа бөгөөд эдгээрийн ихэнх нь цагаан арьст Өмнөд Африкчууд байх болно.

Энэ нь дэлхийн өнцөг булан бүрээс дайн, хавчлагад өртөн зугтаж буй хэдэн зуун мянган хүнийг өмнө нь “орогнохыг”зөвшөөрдөг байсантай харьцуулахад огцом буурсан үзүүлэлт юм. Захиргааны энэ мэдээг Холбооны Бүртгэлийн газар пүрэв гарагт нийтэлсэн байна.

Энэ нь Байдены засаг захиргаа өнгөрсөн жилд дээд хязгаар 125,000 хүнээр тогтоосонтой харьцуулахад эрс буурсан үзүүлэлт юм.

Ассошиэйтед Пресс агентлаг өмнө нь засаг захиргаа 7500 дүрвэгч, голдуу Өмнөд Африкийн цагаан арьстнуудыг хүлээн авахаар хэлэлцэж байгаа талаар мэдээлж байжээ.

Засгийн газрын санамж бичигт 2026 оны санхүүгийн жилийн хугацаанд 7500 дүрвэгчийг хүлээн авах нь "хүмүүнлэгийн санаа зовнилоос үүдэлтэй, бас үндэсний ашиг сонирхолд нийцсэн" гэж дурдсан байна.

Энэхүү мэдэгдэл нь дүрвэгсдийн байгууллагуудын шүүмжлэлд өртөж, Олон улсын дүрвэгсдэд туслах төслийнхөн "Энэ шийдвэр нь Трампын засаг захиргаа хүний эрхийг хамгаалахаас улс төрийг илүү эрхэмлэдэг болохыг харуулж байна." гэжээ.

"Африкчуудад давуу эрх олгохын зэрэгцээ аль хэдийн шалгагдаж, зөвшөөрөгдсөн олон мянган дүрвэгсдэд хориг тавьснаар засаг захиргаа хүмүүнлэгийн хөтөлбөрийг дахин улстөржүүлж байна. Урт хугацааны шалгалтыг давсан, одоогоор аюултай, найдваргүй нөхцөл байдалд гацсан дүрвэгсдийг оруулахгүй байх нь аймшигтай юм" гэсэн байна.

АНУ-д төвтэй Global Refuge компанийн гүйцэтгэх захирал Криш О'Мара Вигнаражах уг шийдвэрийг ёс зүйн талаас нь шүүмжилжээ. Тэрбээр "Энэ шийдвэр нь дүрвэгсдийг хүлээн авах дээд хязгаарыг бууруулаад зогсохгүй, ёс суртахууны хэмжээг давж байна. Дөч гаруй жилийн турш АНУ-ын дүрвэгсдийн хөтөлбөр нь дайн, хавчлага, хэлмэгдүүлэлтээс зугтаж ирсэн гэр бүлүүдэд аврал болж ирсэн. Афганистанаас Венесуэл, Судан болон бусад улс орнуудад хямрал болж буй үед хүмүүст дүрвэгсдийг хүлээн авах хөтөлбөрүүдийн найдвартай байдал чухал байна.” гэжээ.

Америкийн Цагаачлалын Зөвлөлийн ахлах ажилтан Аарон Рейхлин-Мелник твиттер дээр  "АНУ-ын Дүрвэгсдийн хөтөлбөр 1980 онд байгуулагдсанаас хойш угсаатны цэвэрлэгээ болон бусад аймшигт явдлаас дүрвэн зугтсан хоёр сая гаруй хүнийг хүлээн зөвшөөрсөн. Одоо үүнийг цагаан арьст цагаачлалын зам болгон ашиглахаар болж байна." гэсэн байна. 

Трамп хоёрдугаар сард Голланд, Францын колоничлолын оршин суугчдын үр удам болох цагаан африкчуудыг "арьсны өнгөөр ялгаварлан гадуурхаж байна" гэж буруутгасныхаа дараа Өмнөд Африкт үзүүлэх санхүүгийн тусламжийг хасах тушаалд гарын үсэг зурсан юм.

Мөн Трампын засаг захиргаа Өмнөд Африкийн засгийн газар Африкчуудын газар нутгийг онилсон гэх газар чөлөөлөх шинэ хуулиар дамжуулан цагаан арьстны эсрэг бодлогыг хэрэгжүүлж байна гэж удаа дараа мэдэгдэж байсан.

Өмнөд Африкийн Засгийн газар африкчуудыг хөдөө орон нутагт арьс өнгөөр ялгаварлан гадуурхах хүчирхийлэлд өртөж байна гэсэн АНУ-ын буруутгалыг худал гэж эрс үгүйсгэж байгаа юм.

Өмнөд Африк даяар фермүүд болон хөдөө аж ахуйн аж ахуйн нэгжүүдийн 72 хувийг цагаан арьстнууд эзэмшдэг бөгөөд энэ нь тус улсын нийт хүн амын 7.3 хувийг бүрдүүлдэг. Харин  тус улсын хүн амын 81.4 хувийг бүрдүүлдэг хар арьстнууд нийт газар нутгийн дөрөв орчим хувийг л эзэмшдэг гэж мэдээлж байна.

Пүрэв гарагт хийсэн мэдэгдэл нь Трамп дүрвэгсдийг нүүлгэн шилжүүлэх тоог бууруулсан анхны тохиолдол биш юм. Анхны бүрэн эрхийнхээ хугацаанд буюу 2020 онд Трамп 2021 оны санхүүгийн жилд дүрвэгсдийн тоог 15,000-аар хязгаарласан. Өмнөх жил нь буюу 2019 онд тэрбээр 2020 оны санхүүгийн жилд хязгаараа 18,000 болгон бууруулж байсан юм.