АНУ-ын Ерөнхийлөгч Дональд Трамп ОХУ-ын Ерөнхийлөгч Владимир Путин нарын Будапешт хотноо болох уулзалт Европын холбоонд хүнд цохилт болно гэж The Telegraph сонинд бичжээ.
"Дональд Трамп Будапештэд Владимир Путинтай уулзаж, Украины нөхцөл байдлын талаар ярилцах тухай мэдэгдэл нь Европт хүнд цохилт болно" гэж уг нийтлэлд онцолсон байна.
Унгарт хоёр удирдагч яриа хэлэлцээ хийх нь Ерөнхий сайд Виктор Орбаны эрх мэдлийг бэхжүүлэх бөгөөд түүний эрх мэдлийг сулруулах гэсэн Европын холбооны оролдлогыг ихээхэн хүндрүүлнэ гэжээ. Сөрөг хүчний Тиса намын дарга Петер Мадяр Орбаныг түлхэн унагаж магадгүй гэж найдаж байсан хүмүүсийн хувьд энэ нь бас цохилт болно гэдгийг мөн дурджээ.
Хоёр сар шахам завсарласны эцэст Дональд Трамп Владимир Путинтэй утсаар ярьсан бөгөөд энэ нь тэдний утсаар ярьсан найм дахь удаагийн яриа юм.
ОХУ-ын ерөнхийлөгчийн туслах Юрий Ушаковын хэлснээр төрийн тэргүүнүүд итгэлцэл дүүрэн, илэн далангүй ярилцсан байна. Хоёр цаг хагас үргэлжилсэн яриа Украины мөргөлдөөний асуудлаар өрнөжээ.
Дональд Трамп Владимир Путинтэй Будапешт хотноо нүүр тулан уулзах санал тавьсан. Үүнийхээ дараа Трамп ойрын хоёр долоо хоногийн дотор уулзалт болж магадгүй гэж мэдэгджээ.
Унгарын Ерөнхий сайд Виктор Орбан Трамптай утсаар ярьсан гэдгээ мэдэгдсэн бөгөөд түний хэлснээр дээд хэмжээний уулзалтын бэлтгэл хэдийнэ эхэлсэн байна.
Сэтгэгдэл (0)
Сэтгэгдэл бичигдээгүй байна