Open AI өөрийн ChatGPT чатбот дээрх хязгаарлалтыг зөөлрүүлэх төлөвлөгөөгөө өчигдөр /2025.10.15/ зарлажээ. Тус компани нь насанд хүрсэн хэрэглэгчдэд эротик контентийг зөвшөөрөх гэнэ.
OpenAI-ийн төлөвлөгөөнд ChatGPT-ийн шинэчлэгдсэн хувилбар багтсан бөгөөд энэ нь хэрэглэгчдэд хүн шиг хариу үйлдэл үзүүлэх, эможи ашиглах, найз шиг зан гаргах зэрэг AI туслахынхаа зан чанарыг өөрчлөх боломжийг олгож байгаа аж. Бас нэгэн өөрчлөлт нь 12 дугаар сард хийгдэх бөгөөд OpenAI нь насанд хүрэгчдэд эротик контентийг зөвшөөрөх гэнэ.
Тус компани есдүгээр сард 18-аас доош насны хэрэглэгчдэд зориулсан ChatGPT туршилтыг эхлүүлж, тэдэнд тохироогүй зарим контентыг хязгаарлахаар болсон байна.
Түүнчлэн ChatGPT-тэй хэрхэн харьцаж байгаагаас нь насанд хүрсэн эсэхийг эсэхийг тооцоолдог зан төлөвт суурилсан насыг таамаглах технологийг хөгжүүлж байгаагаа мэдэгджээ.
OpenAI-ийн гүйцэтгэх захирал Сэм Алтман твиттер дээр бичсэн нийтлэлдээ сэтгэцийн эрүүл мэндийн асуудлыг шийдвэрлэхийн тулд хиймэл оюун ухааны харилцан ярианд илүү хатуу цензур тавьж байгаа гэсэн байна.
Калифорнид өсвөр насны Адам Рэйн гэх хүү энэ оны эхээр амиа хорлож нас барсны дараа эцэг эх нь ChatGPT түүнд өөрийгөө хэрхэн “хороох” талаар тодорхой зөвлөгөө өгсөн гэж шүүхэд нэхэмжлэл гаргасан байдаг. Үүнээс үүдэж Open AI ChatGPT-ийн аюулгүй байдлын хяналтыг чангатгасан.
Мөн хиймэл оюун ухаант чатботууд хүүхэд, өсвөр насныханд хэрхэн сөргөөр нөлөөлж буй талаар OpenAI зэрэг хэд хэдэн технологийн компаниудад холбогдох газраас шалгалт ч явуулсан юм.
Сэтгэгдэл (0)
Сэтгэгдэл бичигдээгүй байна