ГАЗЫН ЗУРВАСТ ХОЁР ЖИЛ ҮРГЭЛЖИЛСЭН ДАЙН ЗОГСЛОО

Израиль болон Палестины нутаг дэвсгэр даяар өчигдөр /2025.10.13/ баяр ёслол болж, Газын зурваст хоёр жил үргэлжилсэн дайн зогслоо. 

Дайныг зогсоох АНУ-ын зуучлалын төлөвлөгөөний эхний чухал үе шатанд Хамас Израилийн амьд бүх хүмүүсийг буцааж өгсөн бол Израиль бараг 2000 палестин хоригдлыг суллажээ.

Барьцаалагдсан хүмүүсийн ар гэрийнхэн суллагдсан дотны хүмүүсээ угтан авахдаа баярлан хашгирч, уйлж байх үеийн сэтгэл хөдөлгөм дүр төрх хэвлэлүүдээр цацагдаж байна.

АНУ-ын ерөнхийлөгч Дональд Трамп эхний барьцааны хүмүүсийг гэр бүлийнхэнтэй нь уулзуулснаас хойш хэдхэн минутын дараа Израильд газардаж, Израилийн парламентад үг хэлэв. 

Дараа нь тэрбээр Египетийн Шарм-эль-Шейх хотод болох дээд хэмжээний уулзалт руу нисэж, 20 гаруй удирдагчидтай уулзаж, Газын бүс дэх энх тайвны төлөвлөгөөний дараагийн үе шатуудын талаар хэлэлцээ хийжээ.

Дээд хэмжээний уулзалтын үеэр Египет, Катар, Турк, АНУ Газын зурвасыг сүйрүүлсэн хоёр жилийн дайныг зогсоох зорилготой гал зогсоох хэлэлцээрийн батлан даагчаар тунхаг бичигт гарын үсэг зурсан байна. 

Ийнхүү баяр хөөр болж буй хэдий ч гал зогсоох хэлэлцээрийг тогтвортой хэрэгжүүлж, энх тайвныг бий болгоход олон сорилт тулгарсаар байгаа юм.

Трампын 20 зүйл бүхий энхийн төлөвлөгөөний сүүлийн үе шатууд нь маргаантай асуудлуудаар дүүрэн байгаа бөгөөд урагш ахихын тулд эрчимтэй хэлэлцээ хийх шаардлагатай.

Израилийн цэргийнхэн Хамас талийгаач болсон дөрвөн хүний цогцсыг л буцааж өгнө гэж мэдэгдсэнд эгдүүцэж байгаагаа илэрхийлжээ. Тэдний хэн болохыг батлахаас өмнө шүүх эмнэлгийн шинжилгээ хийж, ар гэрийнхэнд нь мэдэгдэх болно гэсэн байна. 

Газын зурваст барьцаалагдсан 24 хүний цогцос үлдсэн гэж таамаглаж байна.  

Хүүтэйгээ эргэн уулзсан палестин эмэгтэй зүрх минь амар амгалан боллоо гэжээ.

"Үнэнийг хэлэхэд, зовлон зүдгүүрийг туулсан ч өнөөдрийн аз жаргал, баяр баясгаланг үгээр хэлэхийн аргагүй юм . Өнөөдөр бид баяраа тэмдэглэхээр ирлээ" гэж палестин эр өгүүлжээ.

Бүх насаар хорих ял эдэлж буй 250 орчим палестин хоригдлыг Израиль мөн сулласан бөгөөд 100 орчим нь эзлэгдсэн Баруун эрэгт суллагдсан байна.