Дэлхий даяар тун алдартай Австралийн гал сөнөөгчдийн 2026 оны хуанли бэлэн болжээ.
Австралийн олон зуун гал сөнөөгчид тус хуанлид зургаа оруулах гэж бие бялдраа хөгжүүлэх бэлтгэл дасгал хийж, гэрэл зургуудаа илгээдэг бөгөөд цөөн нь шилэгдэн нийтлэгддэг. Гал сөнөөгчдийн булчинлаг биеэ харуулсан, амьтадтай эсвэл ганцаараа авахуулсан зураг бүхий тус хуанлиг дэлхийн 90 гаруй улсад борлуулдаг байна.
1993 оноос хойш хэвлэгдэж эхэлсэн уг хуанлийн борлуулалтаас олсон орлогыг Австрали болон олон улсын хэмжээнд амьтдын халамж, хүүхдийн эмнэлэг, анхны тусламж үзүүлэгчдэд зориулсан сэтгэцийн эрүүл мэндийн үйлчилгээ, гамшгийн дараах сэргээн босголт зэрэг буяны үйлсэд зориулдаг юм.
Энэ удаад таван төрлийн хуанли гаргах бөгөөд нохой, муур, морь, олон төрлийн амьтан, түүнчлэн нэг нь зөвхөн гал сөнөөгчдийн зургуудаас бүрдсэн байх ажээ.
Хуанлийн борлуулалтын орлогыг 2024 онд АНУ-ыг сүйрүүлсэн Хелен, Милтон хар салхинд нэрвэгдэгсдийг дэмжих, 2025 онд Калифорнид гарсан түймрийн улмаас нүүлгэн шилжүүлсэн амьтдад туслахад зориулсан юм.
Сэтгэгдэл (0)
Сэтгэгдэл бичигдээгүй байна