АНУ-ын Калифорни мужийн Пидмонт /Piedmont/ хотод гарсан “Cybertruck” машины ослын улмаас нас барсан хохирогчдын ар гэрийнхэн Тесла компанийг шүүхэд өгч, нэхэмжлэл гаргажээ. Энэ нь тухайн долоо хоногт авто машины ослын улмаас нас барсан хохирогчидтой холбоотой машин зохион бүтээгч компанийг шүүхэд дуудсан хоёр дахь хэрэг болж байна.
Жак Нелсоны эцэг эх Илон Маскийг дэлхийн хамгийн баян хүн болоход тусалсан компани олон жилийн турш алдаа дутагдлын талаар мэдэж байсан бөгөөд асуудлыг шийдэж болох байсан ч тэгээгүйн улмаас хүү нь үхэлд хүрсэн гэж буруутгажээ.
Аламедагийн шүүхэд “Энэ хэрэг нь Теслагийн “Сybertruck”-ын дизайны "гажиг"-аас үүдэлтэй бөгөөд амь гарч болох байсан ослыг үхлийн хөнөөлтэй гал болгосон” гэсэн гомдлыг гаргасан байна. Нелсоны гэр бүлийг хэд хэдэн хуулийн фирм төлөөлж байна. Тесла одоогоор энэ асуудлаар тайлбар өгөөгүй байгаа юм.
Мөн ижил нэхэмжлэлийг хохирогч Криста Цукахарагийн эцэг эх пүрэв гарагт гаргажээ.
Цукахара 19, Нелсон 20 настай байсан бөгөөд тэд 2024 оны 11 дүгээр сарын 27- ны өдөр Cybertruck машинд жолооч, өөр нэг найзын хамт явж байгаад мод мөргөснөөс үүдэн гал гарсан гэж Калифорнийн хурдны замын эргүүл мэдээлсэн.
Гал гарснаар машины цахилгаан хаалганы тэжээл тасарч, зорчигчид гарах аргагүй болсон байна. Жолооч мөн нас барсан юм. Аврах багийнхан машины цонхыг хагалан дөрөв дэх зорчигчийг гаргаж авч чадсан.
Cybertruck-д байсан дөрвөн залуу дотны найзууд байсан ба эцэг эхчүүд нь хүүхдүүдээ Теслагийн найдваргүй дизайны хохирогчид болсон гэж үзэж байгаа юм.
Үндэсний хурдны замын хөдөлгөөний аюулгүй байдлын захиргаа Cybertruck-ын их биетэй зэрэгцээ байдаг цахилгаан бариулын талаар мөрдлөг эхлүүлсэн.
Жолооч нар машинаасаа гарчихаад арын суудалд байгаа хүүхдээ авч чаддаггүй, зарим тохиолдолд үүнээс үүдэн цонхоо хагалах хэрэгтэй болсон гэж ярьсныг холбогдох байгууллага шалгаж байгаа.
Теслагийн машины хаалганы бариул хэд хэдэн ослын хэрэгт гол асуудал болоод байгаа юм. Учир нь ослын үед гал гарвал батарей гэмтэж онгойлгох товчлууруудыг олоход хэцүү байдаг нь аюул үүсгэдэг аж.
“Тухайн хаалганы нөөц гар аргаар онгойлгох механизм нь хаалганы доод хэсгийн доторлогооны ард нуугдсан, тэмдэглэгээгүй , мөн гал утаа гарч, тэвдсэн үед олоход маш хэцүү. Cybertruck-ын энэ дизайн нь Жак болон бусад зорчигчдод зугтах боломжийг олгоогүй гэж үзэж байна.” гэж Нелсоныхон мэдэгджээ.
Cybertruck-ын аюулгүй байдалтай холбоотой шүүхэд нэхэмжлэл гаргасан өөр хэд хэдэн тохиолдол бий. Өнгөрсөн наймдугаар сард Флоридагийн шүүх Cybertruck-ын Autopilot mode-с болж амь насаа алдсан 22 настай охины гэр бүлд 243 сая ам.долларыг Тесла компани төлөх ёстой гэж шийдвэрлэсэн билээ.
Э.НАРАН
Сэтгэгдэл (0)
Сэтгэгдэл бичигдээгүй байна