Шүүхээс Америкийн реппер, продюсер Шон “Дидди” Комбст 50 сар хорих ял оногдуулжээ. Мөн тэрбээр 500 мянган ам.долларын торгууль төлөх юм.
Шүүх хурлын үеэр Дидди шүүгчээс "нэг удаа боломж олгохыг" гуйж, гэм буруугаа ухамсарлаж, сүүлийн жилүүдэд өөр хүн болсон гэжээ. Мөн миний үйлдсэн хүчирхийлэл үүрд үүрэх хүнд дарамт минь байх болно гэж хэлсэн байна.
Шүүгч Комбст шийтгэл оногдуулахаасаа өмнө хүчирхийлэгчдэд сануулга өгөхийн тулд багагүй ял оногдуулах шаардлагатай гэжээ. Шүүх шүүгдэгчийн бүх түүхийг авч үзэх ёстой ч сайн үйлс нь хүчирхийллийн хэргийг чинь арилгаж чадахгүй гэсэн байна.
Холбооны шүүгч Арун Субраманиан шүүх хурал дээр мөн "Хатагтай Вентура, Жэйн та нар бидний төсөөлж ч чадахгүй зүйлтэй тулгарсан" гээд хохирогчоор мэдүүлэг өгсөн эмэгтэйчүүдийг хүчирхэг гэж нэрлэжээ. Ял оноосны дараа Кэсси Вентурагийн өмгөөлөгч Даг Вигдор “Комбсын учруулсан гэмтлийг юу ч арилгаж чадахгүй ч өнөөдөр оногдуулсан ял нь түүний үйлдсэн ноцтой гэмт хэргийн үр нөлөөг хүлээн зөвшөөрч байна" гэж мэдэгдсэн байна.
Алдарт өмгөөлөгч Глориа Аллред Комбсыг хариугаа авч магадгүй гэж эмээж байсан хохирогчид тэр шоронд тодорхой хугацааг өнгөрөөх болсноор тайван байж магадгүй гэжээ. Эмэгтэйчүүдийн шударга ёсны төлөөх томоохон байгууллага болох UltraViolet-ийн кампанит ажил хариуцсан дэд ерөнхийлөгч Николь Регадо Шон "Дидди" Комбсыг эмэгтэйчүүд, эрэгтэйчүүдийг адилхан мөлждөг бэлгийн цуврал хүчирхийлэгч гээд түүний хариуцлага хүлээсэн цорын ганц шалтгаан нь Кэсси болон бусад хохирогчид зориг гаргаж, өөрсдийн харамсмаар түүхээ хуваалцсан гэдгийг санах нь чухал гэдгийг онцолсон.Мөн хохирогчид жинхэнэ Дидди гэж хэн болохыг дэлхий нийтэд харуулахын тулд маш их эрсдэлийг давсныг дурджээ.
Сэтгэгдэл (0)
Сэтгэгдэл бичигдээгүй байна