Трампын цахим сувгийг хаасантай холбоотой нэхэмжлэлийг шийдвэрлэхийн тулд Youtube түүнд 24.5 сая доллар төлөхөөр болжээ.
2021 оны нэгдүгээр сарын 6-нд Капитолд болсон үймээний дараа түүний сувгийг хаасан нь эрхийг нь зөрчсөн гэж үзсэн Дональд Трампын нэхэмжлэлийг барагдуулахын тулд YouTube 24.5 сая доллар төлөхөөр болсон байна. Google-ийн охин компани нь Трампын цахим хаягийг хаасан шийдвэрийнхээ төлөө олон сая долларын төлбөр төлөх технологийн компаниудын сүүлийнх нь болжээ.
Facebook-ийн толгой компани Мета нэгдүгээр сард Трампын үүнтэй төстэй нэхэмжлэлийг 25 сая доллараар шийдвэрлэсэн бол X буюу Twitter хоёрдугаар сард 10 сая доллар төлсөн. Метагийн төлбөрийн ихэнх хэсгийг Трамп Ерөнхийлөгчийн номын санд төвлөрүүлнэ гэсэн билээ.
Трамп YouTube болон Alphabet-ийн гүйцэтгэх захирал Сундар Пичайгийн эсрэг нэхэмжлэл гаргаж, өөрийнх нь эрхийг зөрчсөнөөс гадна олон нийтийн бодол үзэл санаанд нөлөөлж байна гэж буруутгасан.
YouTube-ийн зүгээс Трампын сувгийг хүчирхийллийг өөгшүүлэхийн эсрэг бодлогыг зөрчсөн тул түдгэлзүүлсэн гэж мэдэгдээд байсан юм.
Калифорнийн хойд дүүргийн шүүхэд ирүүлсэн баримтын дагуу Трамп YouTube-ийн төлбөрөөс 22 сая долларыг Үндэсний худалдааны төвийг сэргээн засварлах, хамгаалах, Цагаан ордны хүлээн авалтын танхимыг барих ажилд зориулах гэнэ. Энэхүү тансаг хүлээн авалтын танхим нь 200 сая ам.долларын үнэтэй байх төлөвтэй байна.
Технологийн компаниудын эсрэг энэ гурван хэргийг Трампын хуульч, холбоотон Жон Коул анх гаргаж тавьсан гэж Уолл Стрит сэтгүүлд мэдээлжээ. Коул "Трамп Цагаан ордонд буцаж ирсэн нь технологийн компаниудтай тооцоо хийхэд чухал үүрэг гүйцэтгэсэн. Хэрэв тэр дахин сонгогдоогүй бол бид 1000 жилийн турш шүүхээр явах байсан" гэж ярьжээ. Коул Трампыг "хамгийн тохиромжтой үйлчлүүлэгч" гээд бид төлбөр авснаараа технологийн компаниудын хандлагыг өөрчилсөн гэж бодож байна гэжээ.
YouTube-ийн эсрэг хэрэг 2023 онд хаагдсан ч Трампын өмгөөлөгчид түүнийг Ерөнхийлөгчийн сонгуульд ялсны дараа хэргийг сэргээх хүсэлт гаргасан юм.
2021 оны 1-р сарын 12-нд Капитолын үймээн гарахын өмнө Трамп дэмжигчиддээ хандаж хэлсэн үгтэй бичлэгээ нийтэлсний дараа YouTube анх түүний сувгийг долоо хоногоор хаасан, дараа нь тус компани хоригийг хугацаагүйгээр сунгасан юм. Трамп хоёр дахь удаа Ерөнхийлөгчийн сонгуульд өрсөлдөхөө зарласны дараа буюу 2023 оны гуравдугаар сард YouTube Трампын сувгийг сэргээж, сонгогчдод нэр дэвшигчдийн адил өрсөлдөх боломжийг хадгалахын ач холбогдлын үүднээс гэж мэдэгдсэн билээ.
Сэтгэгдэл (0)
Сэтгэгдэл бичигдээгүй байна