АНУ-ын Ерөнхийлөгч Дональд Трамп ОХУ-ын Ерөнхийлөгч Владимир Путинтэй хамт авахуулсан зургаа Truth Social нийгмийн сүлжээнд өчигдөр /2025.09.04/ нийтэлжээ. Тус зурганд хоёр улсын удирдагчид Аляскийн Анкоридж дахь Эльмендорф-Ричардсон цэргийн баазын дээгүүр нисч буй F-35 сөнөөгч онгоцуудыг харж буйг буулгажээ.
Трамп Европын улсуудын удирдагчид болон Украины Ерөнхийлөгч Владимир Зеленский нартай хийсэн видео хурлын дараа дээрх зургийг нийгмийн сүлжээнд нийтэлсэн байна.
ОХУ-ын эсрэг хориг арга хэмжээний талаарх байр суурийн зөрүүгээс болж Трамп видео хурлын үеэр Европын холбооны төлөөлөгчидтэй "ширүүн яриа өрнүүлсэн". Трамп Орост хориг тавина гэж буй ч нефтийг нь худалдан авч буй Европын улсуудыг хоёр нүүр гаргаж байна гэж шүүмжилсэн гэж барууны хэвлэлүүд мэдээлжээ. Түүнчлэн Трамп тэднээс Оросын нефтийг хэсэгчлэн бус бүрэн худалдаж авахаас татгалзахыг шаардаж, Украины мөргөлдөөний асуудлаар ОХУ-ыг дэмжсэнийх нь төлөө Хятадад эдийн засгийн шахалт үзүүл гэж хэлсэн талаар бичигдэж байна.
Сэтгэгдэл (0)
Сэтгэгдэл бичигдээгүй байна