Английн Засгийн газар таргалалтад нөлөөлж, анхаарал төвлөрлийг бууруулдаг гэсэн шалтгаанаар нэг литрт 150 мг-аас дээш кофейн агуулсан энергийн ундааг 16-аас доош насныханд худалдахыг хориглов.
Red Bull, Monster зэрэг эрчим хүчний ундаа нь таргалалтад нөлөөлж, нойргүйдэл үүсгэж, анхаарлаа төвлөрүүлж чадахгүйд хүргэдэг тул 16-аас доош насныхан худалдан авахыг хориглосныг эрүүл мэндийн мэргэжилтнүүд, багш, шүдний эмч нар сайшаажээ. Тус ундаанд чихэр ихээр агуулдаг нь шүдийг мөн гэмтээд байна.
Дэлгүүр, кафе, ресторан, цахим худалдаагаар дамжуулан 16-аас доош насны хүмүүст литр тутамд 150 мг-аас дээш кофеин агуулсан энергийн ундаа худалдахыг хориглосон нь Red Bull, Monster, Relentless, Prime Energy зэрэг ундааны борлуулалтад нөлөөлөх юм. Жишээлбэл, 250 мл хэмжээтэй Red Bull нь нэг эспрессо эсвэл хоёр лааз колатай адил буюу 80 мг кофеин агуулдаг аж.
Супермаркетууд 2018 онд 16-аас доош насныханд энергийн ундаа худалдахыг сайн дураараа зогсоосон ч зарим жижиг дэлгүүрүүд энэ төрлийн ундааг борлуулсан хэвээр байсан юм.
Бага насны хүүхдүүд сургууль руугаа явах замдаа эрчим хүчний ундаа уусны дараа хичээл дээр анхаарал төвлөрүүлж, суралцахад нь сөргөөр нөлөөлдөг талаар багш нар ярьжээ.
Английн Зөөлөн ундааны нийгэмлэгийн ерөнхий захирал Гэвин Партингтон "Манай гишүүд 16-аас доош насныханд эрчим хүчний ундаа зардаггүй, сурталчилдаггүй бөгөөд кофейн өндөр агууламжтай бүх ундаа нь "хүүхэд хэрэглэхийг зөвлөхгүй" гэсэн анхааруулга шошготой байдаг.” гэсэн байна.
Сэтгэгдэл (0)
Сэтгэгдэл бичигдээгүй байна