ОХУ-ын Ерөнхийлөгч Владимир Путин, АНУ-ын Ерөнхийлөгч Дональд Трамп нарын уулзалт, хэлэлцээр Аляскийн Анкоридж хотод Элмендорф-Ричардсоны цэргийн баазад өчигдөр /2025.08.15/ болж, Украйны асуудлаарх шийдвэрлэх арга зам болон хоёр талын хамтын ажиллагааны боломжуудыг хэлэлцлээ.
Хоёр гүрний удирдагчдын уулзалт орон нутгийн цагаар 11 цаг 30 минутад эхэлж, Ерөнхийлөгч нар хаалттай хаалганы цаана 2 цаг 40 минутын турш ярилцсан бөгөөд ОХУ-ын талаас Гадаад хэргийн сайд Сергей Лавров, Ерөнхийлөгчийн туслах Юрий Ушаков нар, АНУ-ын талаас тусгай элч Стивен Уиткофф, Төрийн нарийн бичгийн дарга Марко Рубио нар байлцжээ. Уулзалтын дараа хамтарсан хэвлэлийн хурал хийсэн. Тус хурал дуусмагц ОХУ-ын Ерөнхийлөгч Аляскийг орхин явсан байна.
Путин Америкийн Ерөнхийлөгчид Аляскад зочлохоор урьсанд талархлаа илэрхийлээд хөршийн халуун дулаан уулзалт болж өнгөрсөн гэж тэмдэглэжээ. Мөн хоёр улс дээд түвшинд уулзалт хийлгүй 4 жил гаруй болж буйг сануулаад энэ хугацаанд харилцаа хүйтэн дайн эхэлснээс хойших хамгийн доод түвшинд хүрсэн гэсэн байна. ОХУ-ын Ерөнхийлөгч Трамптай шууд, сайн холбоо тогтоосон гэдгээ онцлоод хоорондын утсаар хийсэн яриа болон АНУ-ын тусгай төлөөлөгч Стивен Уиткоффын айлчлалыг дурджээ.
Трамп мөн л уулзалтыг үр дүнтэй гэж хэлсэн ч бүрэн ойлголцол, ямар нэгэн тохиролцоонд хараахан хүрээгүй байгааг онцлон тэмдэглэжээ. Тэрбээр НАТО-гийн орнуудын удирдагчид болон Украйны Ерөнхийлөгч Владимир Зеленскийд утсаар уулзалтын талаар мэдээлэл өгч, ярилцах санаатай байгаагаа хэлсэн юм. Трамп ихээхэн ахиц дэвшил гарсныг онцлоод ОХУ-ын Ерөнхийлөгчтэй "маш сайн" харилцаатай байгаагаа тэмдэглэсэн байна.
Путин Трампын Украйны мөргөлдөөнд санаа тавьж буй хүсэлт, үндэслэлийг ойлгож буйгаа илэрхийлжээ. Тэрбээр Украйны байдал нь Оросын Холбооны Улсын аюулгүй байдлын үндсэн асуултуудтай холбогддогийг сануулсан байна. Москва үргэлж Украйны ард түмнийг ах дүүс гэж үздэг, үзсээр ч байгаа. Тэнд болж буй явдал бол ОХУ-ын хувьд аймшигтай гамшиг бөгөөд их шаналал, иймд ОХУ энэхүү байдлыг дуусгахыг чин сэтгэлээсээ хүсэж байна. Гэвч зөрчилдөөний анхдагч суурь шалтгаануудыг арилгаж, ОХУ-ын бүх санаа зовоосон асуудлуудыг харгалзаж, шударгаар жигд тэнцвэрийг олох ёстой. Трамп Ерөнхийлөгчийн Украйны аюулгүй байдлыг хангах ёстой гэж үзэж буйтай ч санал нэг байна гэжээ. Путин мөн Украйны тал шийдэлд чиглэсэн алхмыг зогсоохгүй гэдэгт найдаж буйгаа хэлсэн байна.
Трамп энх тайвныг тогтоох маш сайхан боломж байна гээд ОХУ-ын удирдагчийн зүгээс тэмцлийг дуусгах хүсэлтэй байгааг тэмдэглэж, Путин Ерөнхийлөгч болон түүний багт талархал илэрхийлжээ. Мөн маш ойрын хугацаанд дахин уулзалдах болно гэхэд Путин Москвад гэж хэлснийг хэвлэлүүд онцолж байна.
Ийнхүү хоёр гүрний удирдагчдын уулзалт өөрсдийнх нь хэлснээр тун найрсаг, үр дүнтэй болсон хэдий ч Украйны асуудлаар тодорхой үр дүнд хүрсэнгүй.
Сэтгэгдэл (1)