ОХУ-ын Ерөнхийлөгч Владимир Путин, АНУ-ын Ерөнхийлөгч Дональд Трамп нарын Аляск дахь түүхэн уулзалт өнөөдөр буюу 2025 оны наймдугаар сарын 15-нд Москвагийн цагаар 22:30 цагт эхэлнэ.
Хоёр улсын удирдагчид Элмендорф-Ричардсон агаарын цэргийн баазад уулзах юм. Путин, Трамп хоёрын уулзалт Аляск дахь Зөвлөлтийн нисгэгчдийн оршуулгын газрын ойролцоо болж буй нь бэлгэдлийн шинж чанартай гэж үзэж байна.
Уулзалтад Ерөнхийлөгч нараас гадна төлөөлөгчдийн таван гишүүн оролцоно. ОХУ-аас Гадаад хэргийн сайд Сергей Лавров, Ерөнхийлөгчийн туслах Юрий Ушаков, Батлан хамгаалахын сайд Андрей Белоусов, Сангийн сайд Антон Силуанов, Ерөнхийлөгчийн гадаад орнуудтай хөрөнгө оруулалт, эдийн засгийн хамтын ажиллагаа хариуцсан тусгай төлөөлөгч Кирилл Дмитриев нар, харин АНУ-аас Дэд ерөнхийлөгч Ж.Д.Вэнс, Төрийн нарийн бичгийн дарга Марко Рубио, Тусгай элч Стив Виткофф, Сангийн сайд Скотт Бессент нар оролцоно гэж мэдээлж байна.
Путин, Трамп нар нүүр тулж ярилцсаны дараа хэлэлцээг өглөөний цай хэлбэрээр үргэлжлүүлж, хоёр улсын төлөөлөгчид оролцоно. Хэлэлцэх сэдвүүдийн дунд Украины хямралыг энхийн замаар зохицуулах, Арктикт эдийн засгийн төслүүдийг хэрэгжүүлэх, хориг арга хэмжээ, эдийн засгийн хамтын ажиллагаа зэрэг өргөн хүрээтэй зүйлс багтжээ. Мөн уулзалтын дараа Путин, Трамп нар хамтарсан хэвлэлийн бага хурал хийнэ.
Америкийн цаг уурчдын урьдчилсан мэдээгээр энэ өдөр Аляскад цаг агаар дулаахан, бага зэргийн бороо орох аж.
Оролцогчдын жагсаалтаас харахад Орос улс дипломат харилцаа, аюулгүй байдал, эдийн засгийн ашиг сонирхлыг хамарсан асуудлуудыг хэлэлцэхээр бэлтгэж байгаа бололтой. Сангийн сайд Силуанов ОХУ-ын барууны хориг арга хэмжээний хариуцлагыг хариуцаж байгаа бөгөөд Оросын тал зарим хоригийг цуцлах талаар ярилцахыг хүсэж байж магадгүй шинжээч ярьжээ. Түүнчлэн Ерөнхийлөгчийн гадаад орнуудтай хөрөнгө оруулалт, эдийн засгийн хамтын ажиллагаа хариуцсан тусгай төлөөлөгч Кирилл Дмитриев байгаа нь эдийн засгийн хэлцэлд ихээхэн анхаарал хандуулж буйг илтгэж байна гэсэн байна.
Сэтгэгдэл (0)
Сэтгэгдэл бичигдээгүй байна