Олон улсын хиймэл оюуны хоёрдугаар олимпиадаас Нийслэлийн Эрхэт эрдэм сургуулийн сурагч Чинбатын Ирмүүн, Оюунлаг сургуулийн сурагч Сугаррагчаагийн Хангэрэл нар тус тус хүрэл медаль хүртэж бахдам амжилт үзүүллээ.
Мөн Хобби сургуулийн сурагч Үнэнтөгсийн Эрхэс тусгай байрт шалгарсан байна.
Нийт 61 улсын 284 сурагч хоёр өдрийн туршид машин сургалт, хиймэл оюуны 6 бодлогыг бодож оюун ухаанаа уралдуулан өрсөлдсөн тус олимпиадад манай улсаас 2 багийн 8 сурагч оролцсон юм.
Энэ удаагийн олимпиадын оролцогчид хоёр дахин нэмэгдэж мэдээлэл зүй зэрэг олон жил зохиогдож буй олимпиадын хэмжээнд хоёр жилийн хугацаанд хүрсэн байна. Түүнчлэн тооцооллын дэд бүтэц буюу GPU-г хэрхэн үр бүтээлтэй ашиглах нь оролцогчдын ур чадварыг ихээхэн сорьжээ.
Олимпиадын хүрээнд БНХАУ-ын технологи, шинжлэх ухааны паркуудаар зочилж, Цинхуа, Бээжингийн их сургуулийн эрдэмтдийн илтгэлийг сонирхож, сүүлийн өдөр олон улсын 40 орчим их сургууль, технологийн компани өөрсдийн бүтээгдэхүүн үйлчилгээ, сургалтын онцлогийг харуулсан үзэсгэлэнг зохион байгуулсан байна.
Олимпиадад оролцогчид дан ганц бодлого бодохоос гадна олон улсын байгууллагуудтай холбоо тогтоож хэрхэн амьдралд тулгардаг асуудлуудыг шийддэг талаар мэдлэгтэй болжээ.
Сэтгэгдэл (0)
Сэтгэгдэл бичигдээгүй байна