Монгол Улсын гавьяа жүжигчин, дуучин Т.Баясгалан алтан партнёр С.Жавхландаа зориулж өөрийн цахим хаягтаа ийнхүү бичжээ.
Т.Баясгалан “ЭВ НЭГДЛИЙН ДУУ-МОНГОЛЫН ТЭНГЭРИЙН ЭГШИГ-ЖАВХЛАНДАА” МОНГОЛ УЛСЫН АРДЫН ЖҮЖИГЧИН хэмээх эрхэм хүндтэй цол хүртсэнд чин сэтгэлийн халуун баяр хүргэе!
Бидний нөхөрлөл, хамтын замналын эхлэл өдгөөгөөс 27 жилийн өмнө, хорь ч хүрээгүй хонгор зүстэй, мөрөөдлөөр дүүрэн залуусын үед эхэлж билээ. Тэр цаг мөчөөс хойш бид тайзны хамтрагчид төдийгүй энэ амьдралын урт замд уйлж-унахдаа, урагш тэмүүлэхдээ ч биенээ түшилцэн, нэгнээ өргөж ирсэн билээ. Цаашид ч энэ бат хэлхээ үргэлжлэх болноо.
Хамтдаа дуулсан тайз, алга ташилт, алдар нэрийн мөчүүд мартагдашгүй хэдий ч миний хувьд Жавхлангийн хажууд байгаа тэр хором бүр хамгийн үнэ цэнтэй санагддаг аа.
Жавхлан бол амьдралынхаа бүх өнгийг бусдаас хэзээ ч нуудаггүй, алдаа оноо, инээд нулимс, тэмцэл ялалт алив бүхнээ ил цагаан харуулдаг, гэгээхэн сэтгэлтэй, тийм л эр хүн. Энэ л нээлттэй, үнэнч зан чанар нь Монголчуудын зүрхэнд хүрч, түмэн олондоо хайрлагдаж, Хамаг Монголоо оюун санаа зүрх сэтгэлээрээ нэгтгэн эвийн элч нь болсон билээ.
Жавхланд олгогдсон бүхий л шагнал түүний гайхалтай авьяас, тууштай хөдөлмөрийн үр дүн төдийгүй амьдралынх нь туулсан сорилт, хөлс, нулимс, баяр баясгалангийн гэрч билээ.
Жавхлаан, чи бол зөвхөн Ардын жүжигчин төдийгүй, ард түмний сэтгэлийн үнэт эрдэнэ хэвээр байх болно. Дахин баяр хүргэе!
Хүндэтгэсэн, МУГЖ Т. БАЯСГАЛАН" гэсэн байна.
Сэтгэгдэл (0)
Сэтгэгдэл бичигдээгүй байна