Байгаль орчин, уур амьсгалын өөрчлөлтийн сайд Б.Батбаатар Тужийн нарс түймэрт автаагүй, ойролцоох нутаг дэвсгэрийн хусан ойд түймэр дэгдсэн, мөн ойн түймрийг газар авахуулахгүй унтраахад унанги мод, хорхой шавжинд өртөж хатангиршсан модод саад учруулж, түймрийг өдөөх шалтгаан болж буй талаар өөрийн цахим хуудастаа бичжээ.
Б.Батбаатар "Сэлэнгэ аймагт ажиллаж байна. Монгол орны ойн сан бүхий нутаг Сэлэнгэ аймагт хуурайшилт маш өндөр байна. Ойн сан бүхий газар нутгуудад хуурайшилт ихээр явагдаж байгаа нь цаг уурын өөрчлөлттэй шууд холбоотой. Түүхийн үнэт өлгий болсон “Ноён Уул”, Монгол орны уушги болсон “Тужийн Нарс” аль аль нь өндөр хуурайшилттай байна.
Сэлэнгэ аймгийн Алтанбулаг сумын нутаг, Тужийн Нарс орчимд гарсан түймрийг Онцгой байдлын 140 алба хаагч, байгаль орчны салбарын 57 алба хаагч нийт 24 техник хэрэгсэлтэйгээр 2025 оны зургадугаар сарын 22-ноос 7 хоногийн турш тасралтгүй ажиллаж, цурманд оруулснаар аюулгүй болгов. Тодруулахад, алба хаагчид маань олон түмний хөдөлмөр, хичээл зүтгэлээр сэргээн тордсон “Тужийн Нарс” түймэрт автаагүй гэж онцоллоо. Ойролцоох нутаг дэвсгэрийн хусан ойд түймэр дэгдсэн байна. Урьдчилсан таамгаар байгалийн давагдашгүй хүчин зүйл аянга цахилгааны улмаас түймэр дэгдсэн байж болзошгүй байна. Шалтгаан нөхцөлийг эцэслэн тодруулахаар холбогдох албаны хүмүүс ажиллаж байгаа. Цурмыг бүрэн аюулгүй болгохоор үргэлжлүүлэн ажиллаж байгаа онцгой байдлын удирдлагуудын танилцуулснаар бодлогын түвшинд авч үзэх шаардлагатай цөөнгүй асуудал тулгарсныг хэллээ. Тухайлбал, ойн түймрийг газар авахуулахгүй унтраахад унанги мод, хорхой шавжинд өртөж хатангиршсан модод саад учруулж түймрийг өдөөх шалтгаан болж буйг хэллээ. Үер, хур тундасны усыг хуримтлуулах усан сан, хөвд, цөөрөм байгуулах, аюулгүйн зурвасыг ойн сан газруудад нэмэгдүүлэх, хяналтын камеруудыг өндөрлөг газруудад олноор байршуулах гээд зайлшгүй шийдэх ёстой олон асуудал байна. Цаашид байгалиа хамгаалах чиглэлд БОУАӨ-ийн сайдын хувьд анхаарч ажиллах болно. Эцэст нь өргөсөн тангарагтаа үнэнчээр зүтгэж Эх орноо хамгаалах үйлсэд шантралгүй зүтгэж байгаа Онцгой байдлын алба хаагчид, байгаль хамгаалагчид, байцаагчид, цаг уурын байгууллагын алба хаагчид, иргэд, сайн дурынхан, иргэний нийгмийнхэн гээд хичээл зүтгэл гаргаж ажилласан бүх хүнд талархал илэрхийлье." гэсэн байна.
Сэтгэгдэл (0)
Сэтгэгдэл бичигдээгүй байна