Ромын пап Францис өнөөдөр /2025.04.21/ өглөө 7 цаг 35 минутад таалал төгсжээ.
Пап Францис буюу Хорхе Марио Берголио нь 1936 оны 12-р сарын 17-нд Аргентины Буэнос-Айрес хотод төрсөн бөгөөд 88 насандаа ертөнцийн мөнх бусыг үзүүлэв.
Тэрбээр Католик шашны 266 дахь тэргүүн Пап, Ватикан улсын төрийн тэргүүн юм.
Пап Францисын өвөг дээдэс нь Италиас Аргентинд цагаачилж ирсэн гэдэг. Эцэг төмөр замчин Марио Жузеппэ Берголио, эх Режина Мариа Сивори нарын таван хүүхдийн нэг болон төрсөн байна. Берголио хэдэн жил хими технологич мэргэжлээр ажилласан байдаг. 1969 онд католик шашны санваартны хэргэм хүртэж, 2013 оны гуравдугаар сарын 13-нд 76 насандаа Ромын шинэ Папаар сонгогдож, Францис хэмээх алдрыг хүртсэн юм. 741 оны Сирийн III Григорийгоос хойш буюу мянгаад жилийн дараа Европоос өөр тивээс сонгогдсон Пап, мөн Өмнөд Америкаас гаралтай анхны Пап болсон билээ.
Ромын пап Францис Ерөнхийлөгч У.Хүрэлсүхийн урилгаар 2023 оны 9 дүгээр сарын 1-4-ний өдрүүдэд манай улсад айлчилсан юм.
Сэтгэгдэл (0)
Сэтгэгдэл бичигдээгүй байна