МОНГОЛ ХЭЛ, БИЧГИЙН ШАЛГАЛТ ДӨРӨВДҮГЭЭР САРЫН 18,19-НИЙ ӨДРҮҮДЭД БОЛНО

Монгол хэл, бичгийн шалгалт энэ баасан, бямба гаригт буюу 2025 оны 4 дүгээр сарын 18,19-ний өдрүүдэд болно. 

Энэ жилээс тус шалгалтад 10, 11 дүгээр ангийн сурагчид сайн дураараа оролцох боломж бүрдсэнээр бүртгүүлэгчдийн тоо эрс ихсэж, 85 мянга орчимд хүрсэн юм. Шалгалтад 12-р ангийн 39164, 11-р ангийн 30824, 10-р ангийн 12909 сурагч мөн өмнөх оны төгсөгч 2108 гаруй шалгуулагч бүртгүүлжээ. 

Шалгалт 50 оноотой ба өгөгдсөн даалгаврыг 100 минутад хийж гүйцэтгэх юм. 

Шалгуулагчдаас дараах дөрвөн чадварыг шалгана.

• Уншаад ойлгох чадвар. Энэ нь 700 орчим үгтэй, бүрэн хэмжээний орчуулгын бус эхийг уншаад, сонгох хэлбэрийн 10 даалгаврыг гүйцэтгэнэ. Нийт 20 оноо
• Зөв бичих чадвар. 30-40 үгтэй бичил эхээс алдаатай бичсэн 5 үгийг олж засаж, зөв бичих даалгавар юм. Нийт 5 оноо
• Үндэсний бичгээс хөрвүүлж унших чадвар. Тодорхой бичил эхийг уншаад, түүнийг кирилл бичиг рүү хөрвүүлж бичнэ. Нийт 5 оноо
• Эх зохион найруулж бичих чадвар буюу эсээ бичих. Эсээ нь 250 орчим үгтэй байх бөгөөд хэнд, ямар зорилгоор, ямар хэлбэрээр бичсэн зааврын дагуу бичнэ. Нийт оноо 20

Монгол хэл, бичгийн шалгалтын босго оноо 400 байна. Босго оноогоо даваагүй шалгуулагч элсэлтийн шалгалтад орох эрх нь нээлттэй ч их, дээд сургуульд элсэн орох боломжгүй юм.