Сэтгүүлч Б.Энхзаяа олон нийтэд хэрэг болох нэгэн сэдвийг өөрийн цахим хуудастаа хөндөн бичжээ. Тухайлбал, хүүхэд хэвлийгээр өвдөж байна гэдэг нь утас дэлгэцийн хэрэглээ, буруу дадал зэргээс болсон байх магадлалтай талаар бичсэн байна.
Б.Энхзаяа "Хэвлийгээр өвдөж байна гэдэг хүүхдүүдтэй хүмүүст хэрэг болж магад…
Том хүү наймдугаар сараас эхлээд хэвлий орчмоор өвдөж байна гэдэг зовиур хэлээд, хичээл орох үеэр бүр хүндрэв ээ. Дүүргийн хүүхдийн эмч дээр хэд ч очив. Тодорхой оношгүй, эхо, цусны шинжилгээгээр зүгээр гээд л буцаагаад байсан. Сүүлдээ хичээлдээ явахаа больж, өдөржин зовиур хэлдэг болов. Эх нялхсын яаралтайгаар хэд ч очсон юм. Хэд ч эход нь харуулав.
Харин нэг удаагийн эхогоор хэвлийд олгой төстэй дүрс ажиглагдлаа гэснээр нарийн шинжилгээнүүдэд орлоо. Унтуулгатай ходоод, бүдүүн гэдэсний дуранд зэрэг оров. Хүүхдээ өвдөх, унтуулгатай байгааг харах шиг хүнд зүйл байсангүй.
Хариу ч гарлаа. Тунгалгийн булчирхайнууд томорч, үрэвссэн гэв. Эх нялхастаа хэвтэж эмчлүүллээ, өвчин намддаггүй ээ. Ахиад л эмч дээрээ очлоо. 3 сар ажиглаад булчирхай томорсон байвал хавдрын шинжилгээ хийнэ ээ л гэнэ. Хүүхэд өвдөх, тэр тусмаа оношгүй өвдөх, бүр тэр нь хавдрын шинжилгээ ярьж эхлэх тэнгэр харанхуйлахаас ч цаашаа юм билээ.
Өвдөлт байсаар л байлаа. Ахиад л эмч рүүгээ. Эх нялхсын хоол боловсруулах эмгэг судлалын тасгийн эмч Энхзул “Та нар хүүхдийнхээ сэтгэлзүйтэй ажиллаад үз. Анагаах талаасаа ноцтой өөрчлөлт алга. Хүүхэд маш их мэдрэлийн ядаргаанд орохоор тархинд нь өвдөж байгаа гэдэг мэдрэмж төрөөд өвдөөд байгаа юм. Сүүлийн жилүүдэд ийм зовиуртай хүүхдүүд маш олон болсон” гэлээ. Итгэсэнгүй ээ. Үнэхээр өвдөөд байгаа хүүхэд сэтгэлзүйн асуудлаас болсон гэдэг сонин санагдаад. Гэсэн ч аргаа барсан хүмүүст найдвар тасрах биш. Утас үзэхийг нь болиулаад ярилцаж, тоглоод эхэллээ. Сар хүрэхгүйн дотор ид шидийн гэмээр өвчин зовиур нь алга болоод хичээлдээ ч явж эхэлсэн. Одоо бол хэвийн амьдралдаа ороод үнэхээр сайхан байна. Хүүхдийн сэтгэл зүй гэж маш чухал юм байна.
Хүүхдийнхээ хичээлийг нь хийлгээд инээх, уйлах, загнах шиг сайхан юм алга…
Сандарсан үед тусалсан хүмүүстээ баярлалаа.
Дашрамд дурдахад, Эх нялхсын хоол боловсруулах эмгэг судлалын тасагт хэвлийн өвдөлттэй, тэр нь тунгалгийн булчирхай томорсон гэдэг оноштой хүүхдүүд маш олон ирдэг юм билээ. Хуучин бол ийм оноштой хүүхэд бараг ирж байгаагүй гэдгийг эмч нар хэлж байсан. Уг нь манайх хүүхдүүддээ анхаарчихдаг гээ өөрийгөө бодоод явххд байсан ч хангалттай байгаагүй бололтой. Тэгэхээр сүүлийн үед хоолны буруу дадал, утас дэлгэцийн хэрэглээ, аав ээжүүд хүүхдүүддээ цаг гаргадаггүй энэ 3 шалтгаан хүүхдийн өвчлөлийн том үндэс болдог юм байна гэдгийг хэрэг болж магадгүй гэж бичлээ." гэжээ.
Сэтгэгдэл (0)
Сэтгэгдэл бичигдээгүй байна