Дотоод орчны бохирдол ба бохирдуулагчаас урьдчилан сэргийлэхэд салбар хоорондын уялдааг сайжруулах тухай” хэлэлцүүлгийг Төрийн ордны Их Эзэн Чингис хааны танхимд өнөөдөр /2024 оны 12 сарын 17/ боллоо.
УИХ-ын даргын 2024 оны 107 дугаар захирамжаар байгуулагдсан Ажлын хэсгээс зохион байгуулсан тус хэлэлцүүлэгт Боловсролын сайд П.Наранбаяр оролцож дотоод орчны бохирдол ба бохирдуулагчаас урьдчилан сэргийлэх чиглэлээр "Боловсролын салбарт хэрэгжиж буй бодлого, төсөл хөтөлбөр"-ийн талаар мэдээлэл өглөө.
Тус мэдээлэлд дурдсан АШУҮИС-ийн Нийгмийн эрүүл мэндийн сургуулиас 2022 онд хийсэн “Улаанбаатар хотын ерөнхий боловсролын сургуулийн анги танхимын дотоод орчны агаарын чанарыг үнэлэх судалгаа”-гаар:
-Дотоод орчин дахь тоосонцрын хэмжээ агаарын стандартад заасан үзүүлэлтээс өндөр, агаарын бохирдол их (СХД, БЗД-ийн сургуульд харьцангуй өндөр)
-Хүнд металл буюу хүнцэл, кадми, хар тугалга, цайрын агууламж өвлийн улиралд харьцангуй өндөр хэмжигдсэн.
-Ачаалал ихтэй төв замд зарим сургууль ойр байрладаг нь автомашины гаралтай агаарын бохирдолд илүү өртөж байна.
Цэцэрлэг, ерөнхий боловсролын сургуулийн дотор агаарыг цэвэршүүлэх, бохирдлоос урьдчилан сэргийлэх зорилгоор хөрөнгө оруулалт хийсэн аймаг, дүүргүүдээс:
Ховд, Өвөрхангай, Өмнөговь, Баянхонгор аймаг төвийнхөө бүх цэцэрлэг, ерөнхий боловсролын сургуулиудад;
Баянзүрх дүүрэг 61 цэцэрлэг;
Чингэлтэй дүүрэг 39 цэцэрлэг, ерөнхий боловсролын 17 сургууль;
Хан Уул дүүрэг 41 цэцэрлэг, ерөнхий боловсролын 5 сургууль;
Баянгол дүүрэг 39 цэцэрлэг, ерөнхий боловсролын 4 сургууль;
Сүхбаатар дүүрэг 6 цэцэрлэг, ерөнхий боловсролын 9 сургууль;
Сонгинохайрхан дүүрэг 67 цэцэрлэг, ерөнхий боловсролын 8 сургуульдаа агаар цэвэршүүлэх тор хийх, цонхондоо агаар шүүгч суурилуулах, агаар цэвэршүүлэгч анги танхимд авч өгөх зэргээр хөрөнгө оруулалт хийгээд байна.
Нийслэлийн нийт төрийн өмчийн цэцэрлэгүүдийн 79 хувь нь агаар цэвэршүүлэх Pm2.5 манан ба утааны тоосноос хамгаалах цонхны тор суурилуулсан байна.
Сэтгэгдэл (0)
Сэтгэгдэл бичигдээгүй байна