БНСУ-ын Үндэсний ассамблейн гишүүд тус улсын Ерөнхийлөгч Юн Сок Ёлийг огцруулах эсэх дээр өнөөдөр /2024.12.14/ санал өглөө.
Гишүүд бүрэн бүрэлдэхүүнээрээ буюу 300 гишүүн бүгд санал хураалтад оролцжээ.
Ерөнхийлөгч Юн Сок Ёль 12 дугаар сарын 3-нд цэргийн дэглэм тогтоох зарлиг гаргаж, парламентын гишүүдийн эсэргүүцлээр удалгүй зарлигаа цуцалсан юм. Сөрөг хүчний намуудаас Ерөнхийлөгчийг огцруулах санал дэвшүүлж, парламентын гишүүд санал хураах болсон ч эрх баригч намын гишүүд танхимыг орхиж явснаар ирц хүрээгүйн улмаас Ерөнхийлөгч Юн Сок Ёль бүрэн эрхтэйгээ хэвээрээ үлдсэн. Гэхдээ өнөөдөр Үндэсний ассамблейн гишүүд Ерөнхийлөгчийн огцруулах эсэх дахин санал хураалтад оролцлоо. Нийт 300 гишүүнээс 204 нь огцруулах санал өгчээ. Ингэснээр Ерөнхийлөгчийн бүрэн эрхийг түдгэлзүүлэх юм.
Гэхдээ Ерөнхийлөгч шууд огцрохгүй. Үндсэн хуулийн шүүхээс шийдвэр гаргаж, Ерөнхийлөгчийг огцруулах эсэхийг шийдвэрлэх юм. Үндсэн хуулийн шүүхийн зургаан гишүүн огцруулах шийдвэр гаргавал Ерөнхийлөгчийг ажлаас нь чөлөөлнө. Шинэ Ерөнхийлөгчийн сонгуулийг 60 хоногийн дотор зохион байгуулах хуулийн зохицуулалттай.
Сэтгэгдэл (0)
Сэтгэгдэл бичигдээгүй байна