Боловсролын судалгааны үндэсний хүрээлэнгээс Боловсролын яам, НҮБ-ын Хүүхдийн сангийн дэмжлэгтэйгээр “Монгол хэл, математикийн сургалтын жишиг хөтөлбөрийг явуулын багшийн үйлчилгээгээр хэрэгжүүлэх сургалтын арга зүй” сэдэвт сургалтыг зохион байгууллаа. Сургалтад Говьсүмбэр, Дорноговь, Дундговь, Завхан, Өмнөговь, Хэнтий аймгийн “Насан туршийн суралцахуйн төв”, “Ялгаатай хэрэгцээтэй хүүхдийг дэмжих төв” болон нийслэлийн ерөнхий боловсролын сургуулиудын 40 гаруй багш хамрагджээ.
Тус сургалтад хамрагдсан багш нар ялгаатай хэрэгцээтэй хүүхдийг сургах онцлог, унших, бичих бэрхшээлтэй хүүхэдтэй ажиллах арга зүй болон тэдэнд нэн ялангуяа математикийн сургалтын хөтөлбөрийг хэрэгжүүлэхэд “Eduten” платформыг ашиглах онол болон практик арга зүйд суралцсан юм.
Боловсролын яам, Боловсролын судалгааны үндэсний хүрээлэн, “Боловсролын төлөөх дэлхий нийтийн түншлэл” /GPE/ хамтран энэ онд хамтын ажиллагааны хүрээнд нийслэл, орон нутгийн дунд ангийн 2500 багшийг “Ерөнхий боловсролын сургуулиудийн сургалтын хөтөлбөрт тохируулга хийх арга зүй” сургалтад хамруулсан. Энэхүү сургалтын үргэлжлэл болгож ялгаатай хэрэгцээтэй хүүхэдтэй ажиллах арга зүйд багш нарыг чадавхжуулах сургалтыг өнөөдөр /2024.12 сарын 10/ зохион байгуулсан байна.
Сэтгэгдэл (0)
Сэтгэгдэл бичигдээгүй байна