Сэтгүүлч Г.Улсболд гадны төсөл олдохоор форум, зөвлөгөөн, хэлэлцүүлэг, бага хурал зэргийг хийдэг ч тэр нь шийдэлгүй, үр дүнгүй, хайран мөнгө үрсэн зүйл болоод өнгөрдөг үнэн байдлыг өөрийн цахим хуудастаа хөнгөн хийгээд егөөтэй бичжээ.
Г.Улсболд "Гадны төсөл олдохоор Шангрила, Новотель, Блюскай, Туушингийн аль нэг том заалыг түрээсэлж форум, зөвлөгөөн, хэлэлцүүлэг, бага хурал мурал хийнэ. Хурал хэсдэг өнөөдүүлийг урина. Урдуур эгнээнийхэн өнөө л хэд. Дундуур эгнээнийхэн ч бас. Ардуур суудал дүүргэх үүрэгтэй ажилтнууд сууна аа. Цөөн хүн хүнтэй танилцах, шинэ юм сонсох ариун зорилготой.
Фанфар явлаа дарга нээлээ, гуйлгын мэндчилгээнүүд хэлүүллээ, хэдэн илгээлт, илтгэл болцгоогоод шийдэлгүй хэлэлцүүлэг. Мессэжгүй. Өдрийн цайнаас өмнө хүн залхаад цөөрөхөөс урьтаж зургаа авахуулна аа, зохион байгуулагчид нь голдоо төслийн санхүүжүүлэгчээ даргатайгаа хийж тал талаас нь шахаж нуруулдаад зургаа даруулна. Энэ их чухал зураг, зөндөө их хүн, дарга оролцуулсан, төрд зөвлөмж өгсөн гэж тайлагнах учраас маааааш чухал.
Төлөөлөгч гэх үү, оролцогч гэх үү хүүхнүүдийн идэвх нь зааланд биш урилгаа сторидох, анонсны урд зураг даруулж постлоход гарна. Удаан уулзаагүй зарим найз суудлаа сольж бөөгнөрөөд гараад үргэлжлүүлэх тухайгаа ярина. Эрчүүд нь хурлын зааландаа унтаа, утсаа ухаастай.
Энэ муу ер нь хэн болоод гэсэн басамжилсан харцаар тайзны тавилгуудаа хяламхийнэ. Илтгэгч нь цаасаа уншина, нэг бол пресентац нь зүгээр текст, жирийгээд харагдахгүй, уйтгартай, тэрийгээ давтаж уншина, хамтдаа. Тэдний илтгэлийг хаяж гараад бөөгнөрсөн тамхины цэгийнхний яриа нь цохилттой бөгөөд шийдэлтэй.
Заалны тал нь өдрийн буфет, стори, постны дараа цүнх, хувцсаа бариад тонгойгоод гарч одно. Аан тийм, завсарлагаанаар дарга нар, илтгэгчдийг, мэдээж мөнгө гаргасан гадаад байгууллагын суурин төлөөлөгчийг зурагт, сайтын мэдээнд яриа өгүүлнэ. “Гоё болж байна аа, маш чухал юм ярьж байна” гэсхийгээд.
Үдээс хойших хэлэлцүүлэг явна, заал бараг сонсохгүй, дуусахад өвгөчүүд микрофон шүүрч улстөржинө, залхаана. Өөр асуух, үг хэлэх хүн байна уу гээд хөтлөгч залуу асууна, байхгүй л дээ.
Улиг зөвлөмжөө гаргасхийгээд мандат өргөх гэсэн чинь цөөрчихсөн. Батлах гэсэн өөрсдөө үлдчихсэн. Хааж үг хэлэх дарга нь ядарчихсан, орлогчоо юм уу, тамгаа “Чи гар” гээд дохиостой. Тэр нь бантсан маягаар “Энэ хүртэл алтан цагаа зориулж, чилсэн та бүгдэд баярлалаа” гээд хаана. Тэр хүртэл суулгах гэж л оройн буфетыг хамгийн сүүлд тавьдаг нь гарцаагүй. Хурал зохион байгуулалт хийсэн баг Монголд хэрэгтэй юм хийсэн гэдэгтээ нэгэнт итгэлгүй тул “Ашгүй нэг юмны ард гарлаа п” гээд бушуухан тарцгаана, эсвэл стрессээ тайлж караоке орно шдээ.
Шийдэлгүй хурал цуглааныг гадны донор байгууллагын мөнгөөр хийж, хайран санхүүжилтийг байгууллагынхаа нэрийг томоор бичсэн даавуун тор, анонс, шторк, хоол, заалны түрээс, брошурт үрэхээ боль. Цаад санхүүжүүлж байгаа газрын шар нөхөр ч хариуцлагагүй, байгууллагынхаа мөнгийг цацсан болоод хурлын хоол идэж, дурсгалын зураг хайчилж, зочлуулсан гар байдаг. Тэдэнд, бидэнд ч Монголд үлдэх юм, өнөөдөр тулчихсанаа шийдэх сэтгэл алга. Зүгээр л тайланд зориулсан өндөр зардалтай цуглаанд хайран мөнгө үрээд байна.
Одоо нэг юм болох гэж байна. “Дижитал тусгаар тогтнол” гэнэ үү, үнэн сүртэй нэртэй. Наад Батлан хамгаалахын яамныхан чинь лицензгүй оффис программ хэрэглэдэг болохоор мэдээллээ гадагшаа алдаж байсан шд. Хэдэн яам, агентлагийнхандаа лицензтэй программ аваад өгчихвөл худлаа тусгаар тогтнол могтнол гэж сүржигнэхээс илүү эх оронч үйлдэл болох гээд байх юм." гэжээ.
Сэтгэгдэл (0)
Сэтгэгдэл бичигдээгүй байна