МУИС-ийн дэд профессор, доктор Ж.Баттөр цахим хуудастаа маш чухал нэгэн сэдвийг хөнджээ.
Ж.Баттөр "Оюутнуудаас явцын шалгалт аваад 2 өдөр мэлэрч суулаа.
Оюутнуудын дийлэнх нь хичээлдээ төвлөрөхөө байчихаж.
Утсаа оролдох, лекц дээрээ өөр юм анхаарах, юуг чухал гэж үзэх вэ гэдгээ сайн ялгадаггүй юм шиг санагдлаа.
Гэхдээ нийтлэг хэдэн засчихаж болмоор дутагдлууд байх шиг.
1/ Гүн төвлөрөл гэдгийг суулгамаар байна. Тэр нь тухайн цаг мөчид зааж буй хичээл, эсвэл хийж буй ажилдаа улайрах, төвлөрөх дадал юм. Байнга утсаа ухах, утсаар хүн ярихыг хүлээх, байнга тик ток үзэх зэрэг нь энэ төвлөрөл гэдгийг үгүй хийж байна.
2/ PPT ер нь үр дүнгүй юм байна. Бас л нэг төрлийн дэлгэцийн хоосон маяг. Би бас бусдын жишгээр ППТ бэлдээд лекц ордог. Лав л нэмэртэй санагдаагүй. Төвлөрч сураагүй болохоор ямар ч сайхан лекц үр дүнгүй болж байна.
3/ Бүх багш нар оюутнуудыг жигд шахаж, уйгагүй сурах соёлыг бий болгомоор санагдлаа. Хэт бөөцийлж, цэцэрлэгийн багш шиг аялагдаад байхаар нас биед хүрсэн оюутнууд улам нялцгай, залхуу, хүүхэдлэг болоод тэр нь ахлах курсэд орохоор гол саад болоод байна. Ахмадуудын "Хайр нь дотроо хал нь гаднаа" гэдэг их утга учиртай үг байж. Шахдаг, хал нь гаднаа багш нарыг хамгийн муу багш гэж үзэх хандлагатай болчихож.
4/ Оюутнуудын сурах орчинг бүрдүүлж өгмөөр байна. Гадаадад явж байхад гоё гоё кафе, хооллох газрууд, оюутнуудын уулзах, ярилцах өрөөнүүд хангалттай байдаг. Манай их сургуулиуд бол үнэндээ энэ тал дээр яанадаа л юм байгаа шүү.
5/ Оюутныг яаж идэвхжүүлэх вэ гэдэг дээр ёстой тэр судалгааны хурал, семинар хиймээр байна. Тэгэхгүй бол ер нь багш нь ч оюутан нь ч урагшаа явахаа больж байх шиг байна даа." гэжээ.
Сэтгэгдэл (0)
Сэтгэгдэл бичигдээгүй байна