Монгол Улс болон ХБНГУ-ын “Тюрингин” чөлөөт муж хоорондын эдийн засгийн харилцааг хөгжүүлэхэд хамтран ажиллах чиглэлээр Боловсролын яам нь ХБНГУ-ын Эрфуртын Худалдаа Аж Үйлдвэрийн Танхим, ФАВ Сервис-Ашгийн бус хязгаарлагдмал хариуцлагатай компани, мөн "Хөгжил” Мэргэжлийн чиг баримжаа, боловсрол олгох төвүүдийн төлөөлөлтэйгөөр хамтран ажиллахаар тохиролцож, санамж бичигт гарын үсэг зурсан билээ.
Энэ ажлын хүрээнд ерөнхий боловсролын сургуулийн ахлах ангийн суралцагчдад ажил мэргэжлийн чиг баримжаа олгох, хэрэгцээнд суурилсан мэргэжил сонголтын талаар эцэг, эх, асран хамгаалагч, олон нийтэд мэдээлэл өгч, сурталчлан таниулах, туршилт судалгааны ажлыг хамтран загвар төсөл хэрэгжүүлнэ.
Судалгааны дүнгээс харахад Монгол Улсад жилд 40 орчим мянган оюутан төгсдөг бөгөөд 28,5 хувь нь буюу 10 мянга орчим нь ажлын байраар хангагддаг. Гэхдээ тэдний олонх нь мэргэжлээрээ гэхээс илүү мэргэжлийн бус ажлын байранд хамрагддаг байна.
2024-2025 оны хичээлийн жилд ерөнхий боловсролын 20 сургуулийг хэв шинж, байршил, хүүхдийн тоо зэрэг төсөл хэрэгжүүлэгч талын шаардлагын дагуу сонгож загвар төслийн үйл ажиллагааг хэрэгжүүлэхээр хот, хөдөөгийн 20 сургуулийн 11 ба 12 дугаар ангийн 7000 суралцагчид хүрч ажиллахаар төлөвлөсөн байна. Төслийн үр дүнд суралцагчдад ажил мэргэжлийн чиг баримжаа олгох, боловсролын болон хөдөлмөрийн зах зээлд зуучлах, мэдээллээр хангах, дадлага сургалтыг ААН-тэй хамтран зохион байгуулах, төгсөгчдийн ажил эрхлэх ур чадвар нэмэгдэнэ гэж үзэж байна.
Сэтгэгдэл (0)
Сэтгэгдэл бичигдээгүй байна