Бүгд Найрамдах Франц Улсын Лион хотноо энэ сарын 10-15-ны хооронд болсон Дэлхийн ур чадварын 47 дахь уралдаанд Монгол Улсаа төлөөлөн мэргэжлийн болон техникийн боловсрол, сургалтын байгууллагын 7 суралцагч ур чадвараа сорин дэлхийн залуустай эн тэнцүү өрсөлдлөө.
Мэргэжлийн боловсролын салбарын Олимп хэмээгдэн хоёр жил тутамд зохион байгуулагддаг уг уралдаанд 70 орчим улсын 1500 гаруй оролцогч 59 мэргэжлийн ур чадвараар өрсөлдсөнөөс манай 2 суралцагч 700 онооны босгыг давж MEDALION FOR EXCELLENCE буюу шагналт байрт шалгарлаа. Бусад 5 оролцогч маань 700 оноотой маш ойр гүйцэтгэлтэй байжээ. Тухайлбал,
- Гагнуур мэргэжлийн төрөлд оролцогч Өмнөговь политехник коллежийн суралцагч Б.Чухал 704 оноо (Medallion for Excellence)
- CNC Токарь мэргэжлийн төрөлд Барилгын политехник коллежийн суралцагч А.Нямбаяр 701 оноо (Medallion for Excellence)
- Тогооч мэргэжлийн төрөлд Техник технологийн политехник коллежийн суралцагч Г.Азбаяр 696 оноо
- Сантехник мэргэжлийн төрөлд Барилгын политехникийн коллежийн суралцагч Ш.Мөнгөншагай 690 оноо
- Мужаан мэргэжлийн төрөлд Ховд аймаг дахь “Хөгжил” политехник коллежийн суралцагч Н.Буд 688 оноо
- Өрөг угсралт мэргэжлийн төрөлд Барилгын политехник коллежийн суралцагч Ш.Өсөхбаяр 685 оноо
- Цахилгаан мэргэжлийн төрөлд Налайх дүүрэг дэх политехник коллежийн суралцагч Б.Хишигт 684 оноо авлаа.
Мөн Гагнуур мэргэжлийн төрөлд оролцогч Б.Чухал "BEST OF NATION" шагналын эзэн болов.
Сэтгэгдэл (0)
Сэтгэгдэл бичигдээгүй байна